काठमाडौं । आन्तरिक र बाह्य पर्यटकहरूको बाक्लो उपस्थिति हुने काठमाडौंको ठमेल बजार शुक्रबार र शनिबारको साँझ झन् झकिझकाउ हुन्छन् । शनिबार सरकारी विदा हुने भएकाले शुक्रबार नाइट क्लब जाने र रमाइलो गर्ने जमातका लागि विशेष दिन हो । त्यसरी रमाइलो गर्ने समूहमा युवायुवतीदेखि पाको उमेरसम्मका हुन्छन् ।

त्यही मौका छोपेर रमाइलो गर्न मात्र होइन, अवैध शारीरिक सम्बन्ध (मोलमोलाई) का लागि पनि कतिपय ठमेल पुग्ने गर्छन् । त्यो नौलो कुरा पनि होइन । गएको शुक्रबारको दृश्य भने भिन्न थियो । शुक्रबार नाइट क्लब जाने र क्लबबाट फर्किने युवाहरूलाई टार्गेटमा पारेर यौन सम्बन्धका लागि मोलमोलाई गर्ने समूहमा नेपालीसहित विदेशी महिलासमेत देखिए ।

विदेशी महिलाले पनि त्यसरी सडक छेउमै उभिएर क्लबबाट फर्किँदै गरेका युवाहरूलाई हैरानी दिँदै गरेको दृश्य प्रहरीले पनि हेरिरहेका थिए । 

कानुनले बन्देज गरेको क्रियाकलाप सडक छेउमै मोलमोलाई गरेर होटलसम्म पुगेको प्रहरीले देख्यो । त्यसपछि सडक छेउमा उभिएर अवैध क्रियाकलापका लागि मोलमोलाई गर्ने महिलालाई नियन्त्रणमा लिन अपरेशन नै चलायो ।

जसमा २१ जना महिला पक्राउ परे । त्यसमध्ये नौ जना विदेशी महिला रहेको काठमाडौं प्रहरीका एसपी नवराज अधिकारीले जानकारी दिए । 

पक्राउ परेका विदेशी महिलासहित २१ जनामाथि प्रहरीले अभद्र मुद्दामा जिल्ला प्रशासन कार्यालय काठमाडौंबाट पाँच दिन थुनामा राखेर अनुसन्धान गर्ने अनुमति पाएको छ ।  पक्राउ परेका विदेशी महिलाहरूमा आठ जना युगान्डा तथा एकजना केन्याकी महिला छन् ।

प्रहरीका अनुसार, उनीहरूले ठमेल तथा दरबारमार्ग क्षेत्रलाई प्रमुख आधार क्षेत्र बनाएर अवैध गतिविधि सञ्चालन गरेको पाइएको छ । पक्राउ पर्नेमा २६ वर्षदेखि ५४ वर्षसम्मका अफ्रिकी महिला छन् ।

मदिराले लठ्ठिएका युवाहरू मुख्य टार्गेटमा

प्रहरीको अनुसन्धानबाट पक्राउ परेका महिलाहरूले नाइट क्लबबाट मदिरा सेवन गरेर फर्किएका युवाहरूलाई मुख्य टार्गेट बनाएर शारीरिक सम्बन्धका लागि बार्गेनिङ गर्ने गरेको खुलाएको छ । 

उनीहरूले आफैँ बार्गेनिङ गर्ने र आफैँले बुक गरेको कोठासम्म युवाहरूलाई पुर्‍याउने गरेको पाइएको हो । 

जसमध्ये पक्राउ परेका विदेशी महिलाहरू भ्रमण भिसामा नेपाल आउने र नेपाल बस्दा अवैध धन्दा चलाएर फर्किने गरेको पाइएको हो । त्यसरी अवैधधन्दा चलाउनेहरूमा अधिकांश अफ्रिकीमूलका महिला भएको अनुसन्धानमा खटिएका प्रहरीले बताए । अफ्रिकी महिलाबाहेक अन्य कतिपय देशका महिलासमेत त्यस्तो धन्दामा लागेका छन् । 

हाल पक्राउ परेका युगाण्डाका महिलाहरू तीन महिनाको पर्यटक भिसामा आएकाहरू छन् । उनीहरू आफ्नो देशबाट त्यही काम गर्ने योजनाअनुसार नै आउने गरेको प्रहरीको दाबी छ । पछिल्लो समय नेपालीबाहेक विदेशी महिलाको गतिविधि शंकास्पद देखिएपछि प्रहरीले उनीहरूमाथि निगरानी बढाएको छ । 

ठमेलका होटलहरूमा बस्ने र युवाहरूलाई विभिन्न प्रभावमा पारेर अवैध गतिविधि गर्न थालेपछि निगरानीमा राखिएको हो । प्रहरीसँगको बयानका क्रममा विदेशी महिलाहरूले नेपाली युवाहरूलाई प्रलोभनमा पार्न सहज हुने र खर्चसमेत गर्ने देखेपछि अवैध धन्दामा लागेको बयान दिएका छन् । 

पक्राउ परेकाहरूलाई प्रहरी वृत्त लैनचौरमा राखेर अनुसन्धान जारी राखिएको छ । उनीहरू सबै तीन महिनायता मात्रै आएको खुलेको छ ।