काठमाडौं । सप्तरीको सघन सहरी तथा भवन निर्माण कार्यालय राजविराजका तत्कालीन आयोजना प्रमुख रहेका सिनियर डिभिजनल इन्जिनियर सचिन्द्रकुमार देव, तत्कालीन इन्जिनियर मदन राय र सबइन्जिनियर सरोजकुमार यादव भ्रष्टाचार मुद्दामा दोषी ठहर भएका छन् ।

सप्तरीको हनुमाननगर कंकालिनी नगरपालिकाको वडा नम्बर ४ मा पर्ने बाटो ३०० मिटर कालोपत्रे गर्ने क्रममा आयोजनाको ठेक्का इस्टिमेट र योजनाको सम्झौताबाटै बदनियत राखेर कम काम गरी बढी गरेको प्राविधिक मूल्यांकन प्रतिवेदन बनाएर तीन लाख ४७ हजार बढी भुक्तानी दिएको अभियोगमा उनीहरू दोषी ठहर भएका हुन् ।

अख्तियारले उनीहरू सबैलाई तीन लाख ७० हजार असुलउपर गरी जरिवाना र कैद सजाय माग गरेको थियो । तर, विशेष अदालतले तीन लाख ७० हजार बिगो कायम गरी दामासाहीमा ८६ हजार ७५० जरिवाना र तीन महिना कैदको फैसला गरेको छ ।

इन्जिनियर मदन राय र सबइन्जिनियर सरोजकुमार यादवले गलत प्रतिवेदन बनाएको अभियोगमा थप तीन महिना कैद र १० हजार जरिवानाको फैसला सुनाइएको छ ।

यस्तै, कम काम गरेर बढी गरेको रिपोर्ट पेस गरी बढी भुक्तानी लिएका कुन्जा कन्स्ट्रक्सनका प्रोपराइटर गोविन्दप्रसाद मण्डल पनि दोषी ठहर भएका छन् । उनलाई अख्तियारले तीन लाख ४७ हजार नै बिगो कायम गरी मुद्दा दायर गरेकोमा अदालतले ८६ हजार ७५० जरिवानामात्र हुने फैसला गरेको छ ।