![फारुकीको घातक बलिङप्रेरित अफगानिस्तान १२५ रनले विजयी](https://12khari.top/uploads/posts/qwfdg-1717474711.jpg)
काठमाडौं । फजलहक फारुकीको घातक बलिङप्रेरित अफगानिस्तानले आईसीसी ट्वान्टी–२० विश्वकपमा युगान्डाविरुद्ध १२५ रनको फराकिलो जित निकालेको छ ।
मंगलबार गुयनास्थित प्रोभिडेन्स रंगशालामा अफगानिस्तानले प्रस्तुत गरेको १८४ रनको लक्ष्य पछ्याउने क्रममा युगान्डाले १६ ओभरमा सबै विकेट गुमाएर ५८ रन मात्र जोड्न सक्यो ।
युगान्डाका रोबिन्सन ओबुयाले १४ र रियाजत अली साहले ११ रन बनाए । युगान्डाका अरू ब्याटरले दोहोरो अंकमा रन जोड्न सकेनन् । युगान्डाका तीन ब्याटर ‘गोल्डेन डक’ भएका थिए ।
युगान्डालाई सस्तैमा समेट्न अफगानिस्तान फारुकीले पाँच विकेट लिए । घातक बलिङ गरेका उनले चार ओभरमा नौ रन मात्र खर्चिए । नविन उल हक र कप्तान राशिद खानले समान दुई विकेट लिए । मुजिब उर रहमानको नाममा एक विकेट रह्यो ।
![Global Ime bank](https://baahrakhari.com/uploads/bigyaapan/30885600.gif)
त्यसअघि, टस हारेर ब्याटिङमा उत्रिएको अफगानिस्तानले निर्धारित २० ओभरमा पाँच विकेट गुमाएर १८३ रन बनाएको थियो ।
अफगानिस्तानका ओपनरद्वय रहमनुल्लाह गुर्बज र इब्राहिम जद्रान दुवैले अर्धशतक प्रहार गरे । गुबर्जले ४५ बलमा समान चार चौका र छक्कासहित ७६ रन बनाए । जद्रानले ४६ बलमा नौ चौका र एक छक्का प्रहार गरे । यी दुईले पहिलो विकेटका निमित १४.३ ओभरमा १५४ रनको साझेदारी गर्दै अफगानिस्तानलाई उत्कृष्ट सुरुआत दिलाएका थिए । मोहम्मद नाबीले १४ रन थपे ।
युगान्डाका कोस्मोस क्युवुटा र ब्रियन मासाबाले समान दुई विकेट लिए । अल्पेस रामजानीले एक विकेट हात पारे ।