काठमाडौं । काठमाडौं महानगरपालिकाका मेयर बालेन शाहले सोमबार बिहान नेकपा (एमाले)का अध्यक्ष केपी शर्मा ओलीलाई लक्षित गरेर सामाजिक सञ्जालमा एउटा पोस्ट राखे । जहाँ उनले ‘१० हजार करोड काण्ड’ लुकाउन र जनतालाई भुलाउन राज्यको सम्पूर्ण शक्ति लगाइएको आरोप लगाएका थिए ।

खासमा उनले न्युरोडमा महानगरले विस्तार गर्न लागेको फुटपाथ निर्माणमा अवरोध गरेको विषयलाई लिएर आक्रोश पोखेका थिए ।

“यही १० हजार करोडको काण्ड लुकाउन र जनतालाई भुलाउन राज्यको सम्पूर्ण शक्ति लगाएर न्युरोडमा हामीले बनाउन लागेको फुटपाथ फेरि सडक बनाउनु थाल्नुभएछ,” बालेनले लेखेका थिए ।

उनले त्यतिमात्र भनेन् । "...अनि समयमै गिरीबन्धुमा पीडितको बैना फिर्ता गर्नुहोला । नत्र कोही साँच्चैको नयाँ आउला र फाइल पल्टाउला । हुन त पहिले पनि जेल बस्नुभएको हो । धन्यवाद,” उनले लेखेका छन् ।

• ओलीलाई मेयर बालेनले भने– अर्को काण्ड गरेर जनता नझुक्याउनु होला, जेल जानुपर्ला

सोमबार अपराह्न संसद् भवन परिसरमा सञ्चारकर्मीले ओलीलाई गिरीबन्धु टी–स्टेटको विषमा प्रश्न गरे । तर, आक्रोशित देखिएका ओलीले संक्षिप्त जवाफ दिए– बालेनलाई सोध्नू ।

• आक्रोशित ओली भन्छन्– गिरीबन्धुका बारे बालेनलाई सोध्नू

सोमबार साँझतिर ओलीले पत्नी राधिका शाक्यसँगको फोटो फेसबुकमा राख्दै आफूले एक हप्तादेखि सामाजिक सञ्जाल नचलाएको बताएका छन् ।

"फेसबुक नहेरेको पनि झण्डै एक साता पुग्न लागेछ । राधिका र म गोसाइँकुण्ड जाँदाको फोटो मोबाइलको फोटो ग्यालरीमा भेटियो । यो गर्मीमा गोसाइँकुण्ड सम्झँदा पनि शीतल महसुस हुन्छ । शुभरात्रि ।"

ओलीको पोस्ट मेयर बालेनले पनि कमेन्ट गरेका छन् । उनले लेखेका छन्, "ओहो ! गुडनाइट केपी बा, ह्याभ अ स्विट ड्रिम ।"