काठमाडौं । दुईजना अति दक्षिणपन्थी इजरायली मन्त्रीहरूले युद्धविराम प्रस्तावमा सहमत भए गठबन्धन छाड्ने र सरकार ढाल्ने चेतावनी दिएका छन् ।

वित्तमन्त्री बेजलेल स्मोट्रिच र राष्ट्रिय सुरक्षामन्त्री इटामार बेन–गभिरले अमेरिकी राष्ट्रपति जो बाइडेनले ल्याएको युद्धविराम प्रस्तावमा सहमति नजनाउन प्रधानमन्त्री बेन्जामिन नेतान्याहुलाई चेतावनी दिएका हुन् ।

उनीहरूले हमासलाई ध्वस्त नपारेसम्म कुनै पनि सम्झौताको आफूहरू विपक्षमा रहेको बताएका छन् ।

तर, विपक्षी नेता याइर लापिडले नेतान्याहुले प्रस्तावलाई समर्थन गरेमा सरकारलाई साथ दिने वाचा गरेका छन् ।

उसो त प्रधानमन्त्री स्वयंले हमासका नेता र लडाकुहरूको नसकिएमसम्म र सबै बन्धकहरूलाई रिहा नगरेसम्म स्थायी युद्धविराम हुन नसक्नेमा जोड दिएका छन् ।

बाइडेनले ६ हप्ता लामो युद्धविरामको प्रस्ताव ल्याएका छन् । जसअनुसार इजरायली रक्षा बल (आईडीएफ) गाजाको धेरै जनसंख्या भएको क्षेत्रबाट फिर्ता हुनेछ । यस्तै, सबै बन्धकहरूको रिहाइ गरिनेछ । त्यसपछि गाजाको पुनर्निर्माणका लागि योजना बनाउने बाइडेनको प्रस्ताव छ ।

तर, इजरायलका मन्त्री स्मोट्रिचले आफूले नेतान्याहुलाई हमासलाई नष्ट नगरी र सबै बन्धकहरूलाई फिर्ता नगरी युद्ध समाप्त गर्ने प्रस्तावको हिस्ना नबन्न भनेको बताएका छन् । उनले प्रस्तावमा सहमति गरे सरकार नै भंग गर्ने चेतावनी दिएका छन् ।

तर, इजरायलका सबैभन्दा प्रभावशाली विपक्षी नेतामध्येका एक याइर लापिडले प्रधानमन्त्रीलाई आफूहरूको समर्थन रहने बताएका छन् ।

बीबीसीबाट ।