काठमाडौं । खेलको निर्धारित समय सकिन पाँच मिनेट बाँकी रहँदा जोर्डी अल्बाले बराबरी गोल फर्काएपछि मेजर सकर लिग (एमएलएस) मा सेन्ट लुइसविरुद्ध इन्टर मियामी ३–३ को बराबरीमा रोकिएको छ ।

आइतबार बिहान भएको खेलमा मियामीले तीनपटक पछि परेको अवस्था उल्ट्याउँदै एक अंक खोस्न सफल भएको हो ।

खेलको १५औँ मिनेटमा क्रिस डुर्किनले गोल गर्दै सेन्ट लुइसलाई अग्रतामा राखेका थिए । तर, २५औँ मिनेटमा कप्तान लियोनल मेसीको गोलमा मियामी खेलमा फर्किएको थियो । ४१औँ मिनेटमा इन्डियाना भासिलेभले गोल गरेपछि लुइसले पुनः २–१ किो अग्रता बनाएको थियो । तर, पहिलो हाफको इन्जुरी समयमा लुइस स्वारेजले गोल गर्दै मियामीलाई पुनः खेलमा फर्काएका थिए ।

६८औँ मिनेटबाट मियामीका स्वारेजबाट आत्मघाती गोल उपहार पाएपछि लुइसले पुनः ३–२ को अग्रता बनाएको थियो । तर, ८५औँ मिनेटमा अल्बाले बराबरी गोल फर्काएपछि मियामीले सम्भावित हार टारेको हो ।

बराबरीका बावजुद मियामी लिगको इस्र्टन कन्फेरेन्सको शीर्ष स्थानमा कायमै छ । मियामीले १८ खेल खेल्दा ३५ अंक जोडेको छ । १५ खेल खेलेको सेन्ट लुइस भने वेस्टर्न कन्फेरेन्सको ११औँ स्थानमा छ ।