बर्दिया । बर्दियामा अत्यधिक गर्मीका कारण मधुवन नगरपालिकाका सबै विद्यालय थप तीन दिनका निम्ति बन्द गर्ने निर्णय गरिएको छ । यसअघि, जेठ १६ देखि १८ गतेसम्म विद्यालय बन्द गरिएको थियो ।

नगर शिक्षा समितिको शनिबारको बैठकबाट जेठ २२ गतेदेखि सञ्चालनमा आउने गरी थप तीन दिन विद्यालय बन्द गर्ने निर्णय गरिएको उक्त शाखाका प्रमुख नारायण खनालले बताए ।

बर्खे बिदाबाट कट्टा हुने गरी सबै विद्यालयको प्रशासनिक कार्य गर्न÷गराउन बाधा नपर्ने गरी पठनपाठन कार्य मात्र बन्द गरिएको मधुवन नगरपालिकाका शिक्षा सुपरिवेक्षक खगेन्द्रप्रसाद खनालले बताए । बिदा घोषणा गरिए पनि मौसम अनुकूल भएको खण्डमा पठनपाठन गर्न सकिने उनले जानकारी दिए ।

गर्मीका कारण जिल्ला अस्पताल तथा विभिन्न मेडिकलमा बिरामीको संख्या बढेको छ । बिरामीको चापले अस्पतालमा शय्याको अभाव हुन थालेको जिल्ला अस्पतालका मेडिकल सुपरिटेन्डेन्ट डा. सुवास पाण्डेले बताए । गर्मी र तातो हावाका कारण बिरामी हुनेको संख्या दिन प्रतिदिन बढिरहेको उनले उल्लेख गरे । रासस