काठमाडौं । नेपाली राष्ट्रिय क्रिकेट टिमका कप्तान रोहितकुमार पौडेलले टेस्ट मान्यताप्राप्त राष्ट्रलाई हराएर नेपाल सक्षम छ भन्ने सन्देश दिने बेला भइसकेको बताएका छन् । शनिबार अमेरिकामा अभ्यासका क्रममा सञ्चारकर्मीसँग उनले यस्तो बताएका हुन् ।

टेस्ट मान्यताप्राप्त टिमलाई हराएर नेपाल सबै किसिमबाट सक्षम भन्ने सन्देश विश्वकपमा दिइने उनले उल्लेख गरे । उनले आफूहरू विश्वकपका निम्ति उत्साहित रहेको बताए । “राम्रो खेलेर हामी सबैको नजर तान्नेछौँ,” उनले भने, “टेस्ट मान्यताप्राप्त टिमलाई हराएर हामीले हामी पनि सक्षम छौँ भन्ने सन्देश दिनुपर्छ अब ।”

उनले करिब २५ दिनेदेखि नेपाली टिमले वेस्ट इन्डिज र अमेरिकामा अभ्यास गरिरहेको जानकारी गराए । विश्वकपका निम्ति सबै किसिमको तयार गरिएको उनले सुनाए । राम्रो खेलेर समर्थकलाई उपहार दिने उनको भनाइ छ ।

“विश्वकपका लागि एकदमै एक्साइटेड छौँ । २५ दिनदेखि बाहिर नै छौँ । विश्वकप नजिकिँदै गर्दा एक्साइटेड झनै बढिरहेको छ । अभ्यास गरिरहेका छौँ । हामी तयारीमा छौँ,” उनले भने, “सबैजना साथमा हुनुहुन्छ । बेस्ट क्रिकेट खेलेर हामी खुसी दिनेछौँ । नेपाललाई अमेरिकामा सपोर्ट छ ।” 

नेपाली राष्ट्रिय क्रिकेट टिमका मुख्य प्रशिक्षक मोन्टी देसाईले पहिलो खेलका निम्ति केन्द्रित भएर अभ्यास गरिरहेको बताए । सबै किसिमले अब नेपाल विश्वकप खेल्न तयार रहेको उनले उल्लेख गरे । “हामीले पहिलो गेमका लागि फोकस गरेर तयारी गरिरहेका छौँ । हामी अब सबै किसिमले विश्वकपका लागि तयार छौँ,” उनले भने ।

उनले योपटक दुई देशमा विश्वकप हुने र उक्त स्थानहरूको वातावरणमा घुलमिल हुन नेपाल एक महिनाअगाडि नै ती देशमा पुगेको र अभ्यास जारी राखेको बताए । “नयाँ ठाउँमा केही तयारी गर्नुपर्ने हुन्छ । त्यसकै लागि हामी करिब एक महिनाअघि नै आएर यहाँ भिज्ने प्रयास गरेका छौँ,” उनले भने, “दुई फरक–फरक देशमा खेल छ, त्यसका लागि हामी अब तयार छौँ ।”

नेपाललाई ब्याटिङ र बलिङमा उत्कृष्टता आवश्यक रहेको भन्दै उनले स्पिनरमा ललितनारायण राजवंशी र सागर ढकालले जिम्मेवारी सम्हाल्ने जानकारी गराए । “दीपेन्द्रसिंह ऐरी अहिले सबै किसिमले रेडी छ, अभ्यासहरू गरिरहेको छ,” उनले भने, “स्पिनर बलरको भूमिका धेरै नै महत्त्वपूर्ण छ, त्यसको लागि ललित र सागर छन् । त्यसले हाम्रो टिम ब्यालेन्स भएको छ ।”

उनले दीपेन्द्रसिंह ऐरी सबै किसिमले ‘फिट’ रहेको बताए । नेपाली टिममा सबै किसिमले ब्यालेन्स मिलेको उनले उल्लेख गरे ।

यही जुन २ देखि अमेरिका र वेस्ट इन्डिजमा आईसीसी ट्वान्टी–२० विश्वकप हुँदै छ । नेपालले आफ्नो पहिलो खेलमा जुन ४ मा नेदरल्यान्ड्ससँग प्रतिस्पर्धा गर्नेछ । न्युज एजेन्सी नेपाल