काठमाडौं । सहकारीको बचत अपचलनमा संलग्नको कारवाहीको माग अब संसद्मा मात्र सीमित रहेन । पीडितलाई न्याय दिनुपर्छ र ठगीमा संलग्नलाई कारबाही गर्नुपर्छ भन्दै कांग्रेसले सडक आन्दोलन थालेको छ ।

आइतबार कांग्रेसले काठमाडौंमा प्रदर्शन गर्‍यो । 

कांग्रेसले सहकारी ठगीमा उपप्रधान तथा गृहमन्त्री रवि लामिछानेको संलग्नता रहेको आरोप लगाउँदै आएको छ ।  लामिछाने सहित दोषीलाई कारबाही गर्न संसदीय छानबिन समिति बनाउनुपर्ने अडान कांग्रेसको छ । जुन कुरा निरन्तर उठाएर कांग्रेसले सदन अवरोध गर्दै आएको थियो । 

तत्कालीन प्रधानमन्त्री केपी शर्मा ओलीले संसद् विघटन गरेपछि कोभिडकालमै कांग्रेस सडकमा उत्रिएको थियो । त्यसपछि सत्तामा पुगेको कांग्रेस लामो समयपछि फेरि सडकमै पुगेको हो । आइतबार उपत्यकाका १५ निर्वाचन क्षेत्रबाट आफ्ना कार्यकर्ता कांग्रेसले सडकमा उतारेको थियो । 

उसले सहकारी पीडितलाई न्याय दिन गृहमन्त्री रवि लामिछानेमाथि छानबिन हुनैपर्ने माग राखेको छ ।

लामिछाने गोर्खा मिडिया नेटर्वकमा प्रबन्ध निर्देशक रहेका बेला सहकारीबाट रकम गएकोबारेमा छानबिन थालिनुपर्ने कांग्रेसको ठहर छ । तर यसका लागि नेकपा एमाले, रास्वपा तयार नभएको माओवादी नेताहरुको टिप्पणी छ ।

आइतबार भएको सभालाई सम्बोधन गर्दै वाग्मती प्रदेश सभापति इन्द्र बानियाँले नेकपा (माओवादी केन्द्र)का अध्यक्ष समेत रहेका प्रधानमन्त्री पुष्पकमल दाहाल ‘प्रचण्ड’ बाटै गणतन्त्र खतरामा रहेको जिकिर गरे ।
 
“माओवादीका अध्यक्ष पुष्पकमल दाहाल ‘प्रचण्ड’ बाट गणतन्त्र खतरामा छ । आफू जसरी संसदीय व्यवस्थामा आउनुभयो, गतिविधि ठिक भएन । तीन तहका सरकारमा डेलिभरी खै ? सरकार संघीयताप्रति इमानदार छैन,” उनले भने ।

उनले नेकपा (एमाले)का अध्यक्ष केपी शर्मा ओलीले गृहमन्त्री रवि लामिछानेको नभएर आफ्नै पार्टीका नेताहरूको संरक्षण गरेको तर्क गरे । सहकारीको बचत अपचलन प्रकरणमा एमालेका नेताहरू जेल जाने सम्भावना रहेकाले जोगाउन ओली लागिपरेको उनको भनाइ थियो ।

“गृहमन्त्रीको बचाउ गरेको होइन कि आफ्नो मान्छेको संरक्षण गरेको हो । हाम्रा जोगिनुपर्छ भन्ने छैन,” उनले भने ।

नेपाली कांग्रेसका महामन्त्री विश्वप्रकाश शर्मा सभामा आक्रोशित देखिए । सभालाई सम्बोधन गर्दै उनले छानबिन समितिबाट ठगी नगरेको प्रमाणित भए गृहमन्त्री रवि लामिछानेलाई माला लगाउन आफैँ जाने बताए ।

“विवाहको कार्डमा बेहुलाको नाम नलेखे पनि हुन्छ ? परीक्षा दिन बसेको विद्यार्थीले आफ्नो रोल नम्बर वा नाम नलेखे पनि हुन्छ ? यो आकासे समितिबाट छानबिन हुन्छ ?,” उनले भने, “हिम्मत राख्नुस् दह्रो मुटु राख्नुस्, ठगी गर्नुभएको छैन भने छानबिनबाट प्रमाणित हुन्छ । माला लगाउन हामी आफैँ आउँला ।”

महामन्त्री शर्माले गृहमन्त्रीमाथि निष्पक्ष, इमान्दार गहिरो ढंगले छानबिन गरिनुपर्ने बताए । शर्माले गृहमन्त्री पद, राजनीति , देश छाड्न कसले भन्यो भनी प्रश्न गरे । सिंहदरबार, बालुवाटारअघि आउने वातावरण प्रधानमन्त्री पुष्पकमल दाहाल ‘प्रचण्ड’ले बनाउन नहुने उनको भनाइ छ । शर्माले ०८४ सम्ममा कांग्रेस प्रतिपक्षमा बस्न तयार रहेको पनि सुनाए ।

“हामी स्वीकार्न तयार छौँ । ०८४ सम्म प्रतिपक्ष लेखिएको होला । बहुमत लिएर आउँला । मिसन ०८४ भन्ने बेला भएको छैन,” शर्माले भने ।
 
यस्तै उनले नेकपा (एमाले)का अध्यक्ष केपी शर्मा ओलीले दोषजति गृहमन्त्री रवि लामछिानेमाथि थोपरेर सहकारीको बचत अपचलन प्रकरणमा संलग्न आफ्ना पार्टीका नेता–कार्यकर्ताको रक्षा गरिरहेको आरोप लगाए । उनले ओली गृहमन्त्रीको बहानामा संसदीय छानबिन समिति बनाउन तयार नहुनुका चार कारण प्रस्तुत गरे ।

“तपाईंकै एमालेका कैयौँ साथीहरू – जो सहकारीमा संलग्न हुनुहुन्छ, रवि लामिछाने त देखिएका पात्र हुन्,” शर्माले भने, “नदेखिएका धेरै पात्र सहकारी सञ्चालन गरेर सहभागी हुनुहुन्छ । ती सबलाई जोगाउन चाहनुहुन्छ, कमरेड केपी ओली । त्यो जोगाउन एमाले पार्टीलाई नै बदनाम गराउने कर्म गरिरहनुभएको छ ।”

उनले सरकारको अंकगणितका कारण ओली लामिछानेको बचाउमा उभिएको जिकिर गरे ।  राष्ट्रिय स्वतन्त्र पार्टी (रास्वपा) लाई ०८४ मा पुग्दा उभिन नसक्ने गरी खुइल्याउने ओलीको दाउ रहेको उनको भनाइ छ ।