काठमाडौं । नेपाली कांग्रेसका महामन्त्री विश्वप्रकाश शर्माले छानबिन समितिबाट ठगी नगरेको प्रमाणित भए गृहमन्त्री रवि लामिछानेलाई माला लगाउन आफैँ जाने बताएका छन् । भृकुटीमण्डपमा आइतबार आयोजित विरोध सभामा शर्माले छानबिन समितिमा गृहमन्त्रीको नाम राख्न नहुने सत्तापक्षको मागमा व्यंग्य पनि गरे ।

“विवाहको कार्डमा बेहुलाको नाम नलेख पनि हुन्छ ? परीक्षा दिन बसेको विद्यार्थीले आफ्नो रोल नम्बर वा नाम नलेखे पनि हुन्छ ? यो आकासे समितिबाट छानबिन हुन्छ ?,” उनले भने, “हिम्मत राख्नुस् दह्रो मुटु राख्नुस्, ठगी गर्नुभएको छैन भने छानबिनबाट प्रमाणित हुन्छ । माला लगाउन हामी आफैँ आउँला ।”

महामन्त्री शर्माले गृहमन्त्रीमाथि निष्पक्ष, इमान्दार गहिरो ढंगले छानबिन गरिनुपर्ने बताए । शर्माले गृहमन्त्री पद, राजनीति , देश छाड्न कसले भन्यो भनी प्रश्न गरे ।

सिंहदरबार, बालुवाटारअघि आउने वातावरण प्रधानमन्त्री पुष्पकमल दाहाल 'प्रचण्ड'ले बनाउन नहुने उनको भनाइ छ । शर्माले ०८४ सम्ममा कांग्रेस प्रतिपक्षमा बस्न तयार रहेको पनि सुनाए ।

“हामी स्वीकार्न तयार छौँ । ०८४ सम्म प्रतिपक्ष लेखिएको होला । बहुमत लिएर आउँला । मिसन ०८४ भन्ने बेला भएको छैन,” शर्माले भने ।