काठमाडौं । वन तथा वातावरण मन्त्रालयका सिनियर डिभिजनल इन्जिनियर ५७ वर्षीय नवीनकुमार पोखरेल मृत अवस्थामा फेला परेका छन् । उनी झुन्डिएको अवस्थामा आफ्नै घर भक्तपुरको लोकन्थलीमा शुक्रबार मृत फेला परेका भक्तपुरका प्रहरी प्रमुख एसपी वेद विष्टले जानकारी दिए ।

वन मन्त्रालयमै कार्यरत रहँदा सेक्युरिटी प्रिन्टिङ प्रेस खरिद प्रकरणमा उनको संलग्नता देखाउँदै अख्तियार दुरुपयोग अनुसन्धान आयोगले विशेष अदालतमा मुद्दा दर्ता गराएपछि उनी निलम्बनमा परेका थिए । अदालतले जेठ ८ गते उनलाई दोषी ठहर गरेको थियो ।

अदालतले उनलाई ६ महिना कैद तथा पाँच करोड ८४ लाख ५५ हजार १५९ रूपैयाँ जरिबाना र सो बराबरको बिगो रकम असुलको फैसला सुनाएको थियो । भ्रष्टाचार मुद्दामा दोषी ठहर भएको तीन दिनपछि उनी मृत फेला परेका हुन् ।

भक्तपुर प्रहरीको प्रारम्भिक अनुसन्धानबाट उनले आत्महत्या गरेको देखिएको छ । पोखरेलको साथबाट सुसाइड नोट समेत फेला परेको छ । नोटमा आफ्नै कारणले आत्महत्या रोजेको लेखेका छन् ।