काठमाडौं । राष्ट्रिय स्वतन्त्र पार्टी (रास्वपा)का तर्फबाट संसदीय समितिको टीओआर निर्माण समितिका सदस्य रहेका रास्वपाका सांसद शिशिर खनालले नेपाली कांग्रेसलाई गृहमन्त्रीको नाम नराखी ‘टीओआर’ बनाउन अनुरोध गरेको बताए । 

उनले व्यक्ति तोकेर गृहमन्त्रीको नाम राख्दा उनी दोषी छन् तर, कति हदसम्म भनेर मात्र छानबिन गरेको जस्तो ‘प्रि–जुडिस’ हुन्छ भनेर नाम नराख्न गरेको आग्रहमा कांग्रेस सकारात्मक देखिएको बताए । “हामीले सुरुदेखि नै राखेको कुरा व्यक्तिको नाम नतोकौँ भनेर भनिरहेका छौँ, नेपाली कांग्रेसले आफ्नो अडान छोडेको छैन,” खनालले भने, “प्रतिपक्षले सदनमा प्रश्न उठाइसकेपछि समिति बनाउने र छानबिन गर्ने कुरा त हुने नै भयो । तर, नाम तोकेर नजाऔँ भनेर अनुरोध गर्दा उहाँहरू सकारात्मक हुनुहुन्छ भन्ने अपेक्षा गरेका छौँ ।” 

उनले कांग्रेसले आफ्नो नेतृत्वसँग छलफल गर्दा सकारात्मक भएमा सहमति हुने भए पनि कांग्रेसमै निर्भर रहेको बताए ।