काठमाडौं । श्रम, रोजगार तथा सामाजिक सुरक्षामन्त्री डोलप्रसाद अर्यालले सबै पालिकाले आवश्यकता अनुसारका मेला आयोजना गर्नुपर्ने बताएका छन् । काठमाडौं महानगरपालिकाले आयोजना गरेको सीप मेलाको बुधबार अवलोकन गरेपछि सञ्चारकर्मीसँग कुरा गर्दै उनले यस्तो बताएका हुन् । 

उनले स्थानीय स्तरमा रोजगारी सिर्जना गरी रोजगारीको वातारण बनाउँदै विदेश जाने लहरलाई रोक्ने प्रयास गर्न आवश्यक रहेको बताए ।

काठमाडौं महानगरपालिकाले गरेको प्रयास प्रशंसायोग्य रहेको उनले बताए । मेयर बोलेन्द्र साहको चर्चा सीप मेलाले गर्दा मात्रै नभएको भन्दै निर्वाचन जितेर आएसँगै चर्चा भइरहेको बताए । उनले मन्त्रालयले सातै प्रदेशमा गर्न लागेको श्रमाधान मेला महानगरले गरेको सीप मेलाभन्दा फरक मेला भएको बताए । 

अर्यालले संघीयतामा सरकारले गर्ने हरेक काम प्रदेशसहित स्थानीय तहहरूमा पुग्न आवश्यक रहेको बताए । महानगरले सीप सिकाएका श्रमिकहरूलाई श्रमाधान मेलामा रोजगारीको अवसर दिने वातावरण बन्नसक्ने पनि उनको भनाइ थियो । 

महानगरले यस वर्ष दुई हजार ८१ जनालाई रोजगारी दिने उद्देश्यले सीप मेला गरिरहेको छ ।