काठमाडौं । नेपालमा वार्षिक साढे ६ हजार व्यक्तिको अस्पताल लैजाने क्रममा मृत्यु हुने गरेको पाइएको छ । स्वास्थ्य सेवा विभागले  प्रकाशित गरेको आर्थिक वर्ष २०७९/०८० को वार्षिक स्वास्थ्य प्रतिवेदनमा आर्थिक वर्ष २०७९/०८० मा ६ हजार ५६८ जनाको अस्पताल लैजाँदै गर्दा मृत्यु भएको उल्लेख छ । 

यो संख्या अघिल्लो आर्थिक वर्षको तुलनामा एक हजार ४०६ बढी हो । यसरी अस्पतालको इमर्जेन्सी कक्षमा नपुर्‍याउँदै हुने ‘ब्रउट डेड’ को संख्या वर्षैपिच्छे बढ्दै गएको रिपोर्टमा उल्लेख छ । 

मृत्यु हुनेमा ६०.७ प्रतिशत पुरुष छन् । अधिकांश मृत्युको कारण सवारी दुर्घटना भएको पनि रिपोर्टमा उल्लेख छ । नेपाल स्वास्थ्य अनुसन्धान परिषद्को पछिल्लो अध्ययनअनुसार नेपालमा वार्षिक एक लाख ९३ हजार जनंख्याको विभिन्न रोगका कारण मृत्यु हुने गरेको छ । 

मृत्युको ७१ प्रतिशत कारण नसर्ने रोगहरू छन् भने २१ प्रतिशत सरुवा रोग, मातृ मृत्युदर, नवजात शिशु तथा पोषणसम्बन्धी रोगका कारण हुने मृत्यु छन् । यस्तै ७.८ प्रतिशत मृत्यु विभिन्न दुर्घटनाका कारण हुने गरेको परिषद्को रिपोर्टमा उल्लेख छ ।