नयाँ दिल्ली । भारतका प्रधानमन्त्री नरेन्द्र मोदीले उत्तर पूर्वी दिल्लीमा शनिबार सम्बोधन गरेको चुनावी र्‍याली हेर्न नयाँ दिल्लीस्थित नेपालसहित केही देशका राजदूतहरू नै पुगेको पाइएको छ । 

भारतीय समाचार एजेन्सीहरूका अनुसार कूटनीतिज्ञहरूको टोलीमा भारतका लागि नेपालका राजदूत डा. शंकरप्रसाद शर्मा तथा सिंगापुरका दिल्लीस्थित हाइ कमिस्नर सिमोन वोङलगायत ६ राजदूत पुगेका थिए ।

समाचार एजेन्सी एएनआईका अनुसार  नेपालका राजदूत शर्माले प्रतिक्रिया दिँदै सो कार्यक्रम नेपालको जस्तै भएको जनाएका थिए । उनले प्रधानमन्त्री समेत सहभागी र्‍यालीको प्रत्यक्ष अनुभव गर्न पाएकोमा गौरव लागेको समेत जनाएका छन् । उनले भारत प्रजातन्त्रको आमा तथा विश्वकै सबैभन्दा ठूलो प्रजातन्त्र भएको समेत जनाएका छन् । 

भारतका प्रधानमन्त्री मोदीले सन् २०२४ को लोकसभा निर्वाचनअन्तर्गत राष्ट्रिय राजधानी नयाँ दिल्लीमा शनिबार पहिलोपटक चुनावी र्‍यालीलाई सम्बोधन गरेका हुन् । सो अवसरमा उनले विपक्षी कंग्रेसको आलोचना गर्दै उसको घोषणापत्र मुस्लिम लिगको जस्तो भएको जनाएका थिए ।

भारतमा अहिले लोकसभाको निर्वाचन जारी छ । अप्रिल १९ मा पहिलो चरणको निर्वाचन भएकोमा अहिलेसम्म चार चरण पूरा भएको  छ र जुन १ मा सातौँ तथा अन्तिम चरणको निर्वाचन हुनेछ ।