काठमाडौं । क्रिकेटर सन्दीप लामिछानले अब देशलाई अझै माथि पुर्‍याउने बताएका छन् ।

बुधबार उच्च अदालत पाटनबाट सफाई पाएपछि छोटो प्रतिक्रया दिँदै उनले आफूले पहिलो दिनदेखि नै निर्दोष रहेको बताउँदै आएको बताए ।

"एक वर्षभन्दा धैरै भयो । पहिलो दिनदेखि नै मैले आफू निर्दोष छु भनेर भनिरहेको थिएँ । धेरै नै तरिकाले मलाई नभएको अपराधको दोषी खडा गरिएको थियो । अन्तत: हामी यहाँसम्म आइसकेका छौँ । मैले पहिले पनि जिल्ला अदालतको फैसलालाई सम्मान गरेकै हो, आज पनि उच्च अदालतको फैसलाको सम्मान गरेर अगाडि बढ्नेछु । जतिले पनि मलाई साथ दिनुभएको थियो, आभारी छु । आगामी दिन नेपाललाई जहाँ मैले पुर्‍याएको थिएँ, त्यसभन्दा पनि माथि पुर्‍याउनेछु," उनले भने ।

उच्च अदालतका न्यायाधीशद्वय सुदर्शन देव भट्ट र अन्जु उप्रेती ढकालको संयुक्त इजलासले जिल्ला अदालतको फैसलालाई बदर गरेर सन्दीपलाई सफाइ दिएको हो ।