site stats
बाह्रखरी :: Baahrakhari
देश
Global Ime bankGlobal Ime bank
रुखमा जलाइएको अवस्थामा फेला परेका विष्णुप्रसादको हत्या अनुसन्धानमा खटियो सीआईबी 

काठमाडौं । काभ्रेको पाँचखाल नगरपालिका–४, जिरो किलो नजिकको वनको एक रुखमा एकजना पुरुषको शव जलाइको अवस्थामा फेला पर्‍यो । २८ वैशाखमा घाँस दाउरा गर्न वन पुगेका स्थानीयले शव देखेपछि प्रहरीलाई खबर गरेका थिए । स्थानीयको खबरपछि प्रहरीले शरीरको बाहिरी भाग पूर्णरूपमा जलेको शव फेला परेको हो । उनको घाँटी र खुट्टामा फलामको तारले रुखमा बाँधेको भेटिएको थियो ।

पाँच दिनसम्म प्रहरीले शवको पहिचान समेत गर्न सकेको थिएन । सोमबार भने उनको शव पहिचान भएको छ । उक्त शव दोलखा भिमेश्वर नगरपालिका–२, राम्पाका विष्णुप्रसाद सुवेदीको भएको खुलेको काभ्रेका डीएसपी राजकुमार श्रेष्ठले जानकारी दिए ।

पछिल्लो समय सुवेदी ललितपुरको टीकाथली बस्दै आएको खुलेको छ । उनी २३ वैशाखदेखि ललितपुर घरबाट बाहिर निस्केको र घर फर्किएका थिएनन् । उनको हत्या भएको निष्कर्षमा पुगेको प्रहरीले उनी जीवितै जलाइएका हुन् वा हत्यापछि जलाइयो भन्नेबारे भने अझै खुलाउन सकेको छैन । प्रहरीले घटनाको अनुसन्धान थालिसकेको छ ।

मृतक सुवेदीले बोक्ने मोबाइल भने घरमै छाडेको खुलेको छ । प्रहरीले घटनास्थल नजिकको टावरसँग कनेन्सन भएका मोबाइलको बीटीएस अध्ययन गरिरहेको छ । शंकास्पद मोबाइल नम्बर संकलन गरेर प्रहरीले सोधपुछ थालिसकेको छ । दुई छोरा र एक छोरी रहेका सुवेदी व्यवसायी हुन् ।

श्रीमती, छोरीसहित टीकाथली बस्दै आएका उनी वैशाख २३ मा दोलखा जाने भन्दै घरबाट निस्केको खुलेको छ । उनको दोलखा चरिकोटमै मेसिनको पार्टपुर्जाको पसल समेत छ ।

सुवेदीको हत्या दर्दनाक र जटिल देखिएपछि प्रहरीको केन्द्रीय अनुसन्धान ब्युरो (सीआईबी)को टोलीले समेत अनुसन्धान थालेको छ । गएको चैत ३० मा बुद्धचित्तको रुख काटेको घटनामा अनुसन्धान गर्न काभ्रे पुगेको सीआईबीका प्रहरी निरीक्षक सुनिल धोजुँकै टोलीले सुवेदीको हत्या अनुसन्धान थालेको हो ।

सीआईबीको टोलीले प्राविधिक रूपमा अनुसन्धानमा सघाइरहेको काभ्रेका डीएसपी राजुकमार श्रेष्ठले जानकारी दिए । सीआईबीको जघन्य अपराध अनुसन्धान पिलरमा कार्यरत सुनिल गएको चैत १९ मा पर्वतको जलजला गाउँपालिका–२, स्थित ६९ वर्षीय सूर्यबहादुर जिसी र उनकी पत्नी ६७ वर्षीया कमला जिसीको हत्याको घटना अनुसन्धान गर्न पर्वत पुगेका थिए ।

उनकै टोलीले करिब एक महिना पछि वैशाख १८ मा हत्यामा संलग्न म्याग्दीका कृष्ण विक र दीपक परियारलाई पक्राउ गर्न सफल भएको थियो ।
 

प्रकाशित मिति: बुधबार, जेठ २, २०८१  १३:११
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
Hamro patroHamro patro