काठमाडौं । सगरमाथाको आरोहण कार्य बुधबार पनि नहुने भएको छ । प्रतिकूल मौसमका कारण बुधबार पनि सगरमाथाको आरोहण कार्य हुन नसक्ने पर्यटन विभागका निर्देशक राकेश गुरुङले जानकारी दिए । मंगलबार पनि प्रतिकूल मौसमका कारण सगरमाथाको आरोहण कार्य हुन सकेको थिएन । 

“सगरमाथाको क्याम्प चारभन्दा माथिको मौसमी प्रतिकूलताको कारण हिजो कुनै पनि टिमको समिट हुन सकेन र आज कुनै पनि समिट नहुने जानकारी पर्यटन विभागको फिल्ड कार्यालय, सगरमाथा बेसक्याम्पले जनाएको छ,” निर्देशक गुरुङले भने । 

आरोहणका क्रममा हराएका दुई मंगोलियन आरोहीहरूको खोज तथा उद्धार कार्य भइरहेको पनि उनले जानकारी दिए । उद्धारका लागि दुई शेर्पालाई मंगलबार नै पठाइएको र उनीहरू प्रतिकूलताका कारण क्याम्प चारमै रोकिएको उनले बताए । साथै उद्धारका लागि थप दुई शेर्पा हाल क्याम्प तीन नजिक पुगेको निर्देशक गुरुङले जानकारी दिए ।