काठमाडौं । राष्ट्रिय स्वतन्त्र पार्टी (रास्वपा)का उपसभापतिसमेत रहेका सांसद स्वर्णिम वाग्लेले विगतको तुलनामा यसपटक नीति तथा कार्यक्रममा केही सुधारका कुरा राखिएको बताएका छन् ।

मंगलबार संसद् भवनबाहिर प्रतिक्रिया दिँदै सांसद वाग्लेले गएका वर्षहरूका नीति तथा कार्यक्रमहरूमा बजेटसँग तालमेल नहुने समस्या रहेको तर यसपटक सामान्य सुधार गरिने कुरा राखिएको बताए ।

“गएका वर्षहरूमा नीति तथा कार्यक्रम र बजेटको तादम्यता थिएन, कर्मकाण्डी मात्र थियो,” उनले भने, “यसपालि ठूला–ठूला कुरा नगरौँ । तर, क्रमिक सुधारहरू चाहिँ हरेक मन्त्रालयमा गरेर हेरौँ भन्ने बिउ चाहिँ लगभग सबै मन्त्रालयमा राखेको मैले पाएको छु ।”

उनले दर्जनौँ सुधारका योजना नीति तथा कार्यक्रममा समावेश भएको बताए ।