काठमाडौं । ललितपुर मेयर्स महिला च्याम्पियनसिपमा सुदूरपश्चिम प्रदेशले ललितपुर मेयर्स–११ विरुद्ध डकवर्थ लेविस (डीएल) पद्धतिअनुसार ११ रनको जित निकालेको छ ।

आइतबार कीर्तिपुरस्थित त्रिवि क्रिकेट मैदानमा भएको खेलमा टस हारेर सुदूरपश्चिमले पहिले ब्याटिङ गर्दै निर्धारित २० ओभरमा ६ विकेट गुमाएर १२२ रनको योगफल खडा गरेको थियो । १२३ रनको लक्ष्यसहित मैदान उत्रिएको ललितपुरले ११ ओभरको समाप्तिमा दुई विकेट गुमाएर ४५ रन बनाउँदा पानी परेपछि खेल रोकिएको थियो ।

यसपछि खेल सुरू हुन नसक्दा सुदूरपश्चिम डीएलएसअनुसार १६ रनले विजयी भएको हो । ललितपुरकी कप्तान पूजा महतो १४ र सरस्वती घर्तिमगर १२ रनमा ब्याटिङ गरिरहेकी थिइन् ।

त्यसअघि पहिले ब्याटिङमा आएको सुदूरपश्चिमकी कप्तान विन्दु रावालले  ३० रन बनाएकी थिइन् । कविता जोशीले २५, लक्ष्मी साउदले १५, सावित्री धामीले १७ र सम्झना खड्काले १३ रन बनाइन् ।

ललितपुरकी पुजा कृतिका मरासिनी र आर्ती महतोले समान दुई विकेट लिएका थिए । पूजा महतो र त्रिशणा विश्वकर्माले एक–एक विकेट हात पारे ।

प्रतियोगितामा पहिलो खेलमै जित निकालेको सुदूरपश्चिम तालिकाको शीर्ष स्थानमा उक्लिएको छ । दुई खेलबाट दुई अंक जोडेको ललितपुर तालिकाको दोस्रो स्थानमा छ ।