ललितपुर । वर्षा र सहकालका देवता मानिने रातो मत्स्येन्द्रनाथको रथ शनिबारदेखि तान्न थालिएको छ ।

पुल्चोकमा निर्माण गरिएको रथ शनिबार बाजागाजासहित गःबहाल पुर्‍याइनेछ । रथ निर्माण यही वैशाख १२ गतेदेखि सुरु गरिएको थियो । वैशाख २७ गते मत्स्येन्द्रनाथलाई रथारोहण गराइएको थियो ।

रातो मत्स्येन्द्रनाथको रथलाई ललितपुर महानगरपालिकाबाट गःबहालतर्फ लगिएको छ । रथलाई पाटनका सबै टोल घुमाएपछि असार शुक्ल चौथीमा जावलाखेल पुर्‍याएर अन्तिम दिन भोटो देखाई अन्त्य गर्ने चलन छ ।

रथयात्रा हेर्न ललितपुर महानगरपालिकाका प्रमुख चिरिबाबु महर्जनको निमन्त्रणामा युरोपेली युनियन, फ्रान्स, इजरायल, नर्वे, दक्षिण कोरिया, स्वीट्जरल्यान्ड, थाइल्यान्ड, संयुक्त अधिराज्यलगायत देशका राजदूत र विश्व बैंक, युनिसेफ, यूएसएआईडी, एसियाली विकास बैंकलगायत निकायका प्रतिनिधि सहभागी भए । रासस