काठमाडौं । राष्ट्रिय स्वतन्त्र पार्टी (रास्वपा)ले सहकारीको बचत अपचलन प्रकरणमा संसदीय छानबिन समिति कुनै हालतमा बनाउन नहुने अडान दोहोर्‍याएको छ ।

मंगलबार सिंहदरबारमा सभामुख देवराज घिमिरे र प्रमुख दलका शीर्ष नेताबीचको बैठकपछि सञ्चारकर्मीसित रास्वपाका प्रमुख सचेतक सन्तोष परियारले व्यक्तिकेन्द्रित गरिएको माग तर्कसंगत नभएको बताए ।

उनले उपप्रधान एवं गृहमन्त्री रवि लामिछानेले आउँदो संसद् बैठकमा आफैँ बोल्नका निम्ति समय माग गरेको भन्दै त्यसपछि संवाद गर्न आग्रह गरे । “समिति कुनै पनि हालतमा बनाउन जरुरी छैन भन्नेमा हामी छौँ,” उनले भने, “सदनमा गृहमन्त्रीले बोलेपछि चित्त बुझेन भने फेरि संवाद गरौँ भनेका छौँ । व्यक्तिकेन्द्रित भएर गरिएको माग तर्कसंगत छैन ।”

बैठकमा नेकपा (एमाले)का अध्यक्ष केपी शर्मा ओलीले गृहमन्त्री लामिछानेलाई त्यसबारेमा स्पष्ट पार्ने मौका दिन आग्रह गरेका थिए । प्रमुख प्रतिपक्ष दल नेपाल कांग्रेसले भने संसदीय छानबिन समिति बनाउनुपर्ने पुरानै अडान दोहोर्‍याएको छ ।