काठमाडौं । नेपाली राष्ट्रिय फुटबल टिमले इंग्ल्यान्डको ‘सी’ टिमसँग खेल्दै छ । इंग्ल्यान्डको एल्डरसट टाउनस्थित इबीबी रंगशालामा हुने यो खेल नेपाली समयानुसार सोमबार राति ८ः४५ बजेदेखि सुरू हुनेछ ।

यस मैत्रीपूर्ण खेलका लागि नेपाल भिन्चेन्सो अल्बर्टो एनेसको प्रशिक्षणमा छ । नेपाली टिमको कप्तानी जिम्मेवारीमा गोलकिपर किरणकुमार लिम्बू छन् ।

नेपालले यसअघि इंग्ल्यान्डमै ब्रिटिस आर्मीसँग मैत्रीपूर्ण फुटबल खेलेको थियो । उक्त खेलमा नेपालले ब्रिटिस आर्मीलाई गोलरहित बराबरीमा रोकेको थियो ।

नेपाली राष्ट्रिय फुटबल टिमले ३५ वर्षपछि युरोप भ्रमण गरेको हो । नेपाली टिमले यसअघि पछिल्लोपटक सन् १९८९ मा युरोप भ्रमण गरेको थियो । त्यसबेला नेपालले साफ च्याम्पियनसिपअघि तत्कालीन पश्चिम जर्मनीमा तयारी स्वरुप स्थानीय टिमसँग मैत्रीपूर्ण फुटबल खेलेको थियो ।