जेरुसेलम । दशौँ हजार इजरायलीहरू युद्धविरामको वार्ताभन्दा पनि बन्धकहरूलाई घर फर्काउनेबारेमा चाँडो सहमति गर्न माग गर्दै सडकमा उत्रिएका छन् । प्रधानमन्त्री बेन्जामिन नेतान्याहूले युद्धलाई लम्ब्याउन खोजेको भन्दै उनीहरूले विभिन्न नारा पनि लगाएका थिए ।

हमासको प्रतिनिधिमण्डल र मध्यस्थकर्ता प्रतिनिधिबीच इजिप्टको कायरोमा वार्ता चलिरहको समयमा शनिबार राति इजरायलका जनता सडकमा निस्केका हुन् ।  मध्यस्थकर्ता र हमास प्रतिनिधिबीचको बार्ता आइतबार पनि जारी रहेको जनाइएको छ । 

दुई पक्षबीच सहमति दीर्घकालीन रूपमा गर्ने कि तत्काललाई भन्ने विषयमा बहस भइरहेको जनाइएको छ । वार्तामा बन्धक रिहा नगरुन्जेलसम्म ४० दिन युद्ध रोकिनुपर्ने विषय उठेको जनाइएको छ । हमासका नेता इस्माइल हनियाले आफूहरूले पछिल्लो प्रस्तावलाई पूर्ण गम्भीरतापूर्वक हेरेको जनाएका छन् । बीबीसी