काठमाडौं । भूमि व्यवस्था, सहकारी तथा गरिबी निवारणमन्त्री बलराम अधिकारीले घरजग्गा कारोबार व्यवस्थित र व्यावसायिक हुन जरुरी रहेको बताएका छन् । ललितपुरमा आइतबार नेपाल घरजग्गा आवास विकास महासंघले आयोजना गरेको रियल इस्टेट सम्मेलनमा उनले यस्तो बताएका हुन् ।

उनले खरिदकर्ताले घरजग्गाको क्षेत्रफल, स्वामित्वको अवस्था, सम्भावित कानुनी अड्चन र मूल्यका बारेमा पारदर्शी र यथार्थ विवरण प्राप्त गर्न यसको कारोबार व्यवस्थित र व्यावसायिक हुनुपर्नेमा जोड दिए । व्यावसायिक मर्यादामा रही प्रचलित कानुनको पालना गरेर व्यवसाय गर्न सकिने वातावरण भए मात्र रियल स्टेट व्यवसाय सबल हुन सक्ने उनले उल्लेख गरे । घरजग्गा कारोबारलाई पारदर्शी बनाउनु चुनौती रहेको उनको भनाइ छ ।

मन्त्री अधिकारीले कानुनबमोजिम व्यवसाय दर्ता वा इजाजत नलिई कारोबार गर्ने परिपाटीले राज्यले अर्बौँको राजस्व गुमाउनुपरेको बताए । कारोबार व्यवस्थित नहुँदा लगानीकर्ता र घरजग्गा खरिदकर्ताको कानुनी संरक्षण समेत कठिन भएको उनको बुझाइ छ ।

उनले नेपालमा घरजग्गा व्यवसायीलाई हेर्ने दृष्टिकोण सकारात्मक बनाउन जरुरी रहेकामा समेत जोड दिए । न्युज एजेन्सी नेपाली