काठमाडौं । चालु आर्थिक वर्ष २०८०/०८१ मा कुल ग्राहस्थ उत्पादन (जीडीपी)को करिब ३४ प्रतिशत आयात हुने अनुमान भएको छ ।

राष्ट्रिय तथ्यांक कार्यालयले मंगलबार सार्वजनिक गरेको राष्ट्रिय लेखा अनुमान अनुसार जीडीपीको ३३.७० प्रतिशत आयात हुने आकलन गरिएको हो ।

आर्थिक वर्ष २०७९/८० मा जीडीपीको ३४.६८ प्रतिशत र आर्थिक वर्ष २०७८/०७९ मा ४२.२७ प्रतिशत आयात भएको कार्यालयले जनाएको छ ।

यस्तै, चालु आर्थिक वर्षमा जीडीपीको ७.९४ प्रतिशत निर्यात हुने तथ्यांक कार्यालयको अनुमान छ । आर्थिक वर्ष २०७९/८० मा जीडीपीको ६.९६ प्रतिशत र २०७८/०७९ मा ६.७० प्रतिशत निर्यात भएको कार्यालये जनाएको छ ।

३६.१५ प्रतिशत बचत

तथ्यांक कार्यालयका अनुसार चालु आर्थिक वर्षमा जीडीपीको ३६.१५ प्रतिशत राष्ट्रिय बचत हुने अनुमान गरिएको छ । गत आर्थिक वर्षमा ३३.७९ र आर्थिक वर्ष २०७८/०७९ मा जीडीपीको २९.६३ प्रतिशत बचत भएको कार्यालयको तथ्यांक छ ।