रियाध । हमास र इजरायलबीच मध्यस्थताका लागि प्रयास तीब्र पारिएको छ । हमासलाई सोमबार इजिप्टको तर्फबाट उसले राखेका बन्धक फिर्ता गर्न र कम्तीमा एक वर्षको लागि युद्धविराम गर्नका लागि प्रस्ताव पठाइएको छ । हमासलाई सो प्रस्ताव स्वीकृत गराउनका लागि इजरायलले पनि गाजा क्षेत्रमा जारी राखिएको आक्रमण बन्द गर्नुपर्ने जनाइएको छ ।

गएको अक्टोबर ७ मा हमासले इजरायलमाथि आक्रमण गरेपछि त्यसपछिका घटनाले गर्दा इजरायल र प्यालेस्टाइनको मामिला झन् पेचिलो बन्दै गएको छ । इजिप्टले राखेको प्रस्तावमा पहिलो चरणमा हमासले सक्दो चाँडो इजरायलबाट बन्धक बनाइएका ३३ जना मानिसलाई रिहा गर्नुपर्ने जनाइएको छ । पहिलो चरणमा त्यति र पूर्ण शान्तिका लागि अन्य सबै बन्धक, मृतकका शवलगायत पनि फिर्ता गर्न आग्रह गरिएको छ ।

हमासका नेताहरुका तर्फबाट २४ घण्टाभित्रमा सोसम्बन्धी जवाफ पाइने प्रस्तावक इजिप्टले अपेक्षा गरेको छ । सो प्रस्तावमा इजरायलको सहमति भए पनि पूर्ण रुपमा सन्तुष्ट भने नभएको जनाइएको छ । केही हप्ताको बीचमा प्यालेस्टाइन बन्दीको रिहाइको लागि हमासले २० देखि ३३ जनासम्म बन्धकलाई रिहा गर्नुपर्ने पछिल्लो प्रस्तावमा उल्लेख छ । कूटनीतिक स्रोतहरूका अनुसार स्थायी शान्तिको पुनस्र्थापनाको प्रस्ताव समेत राखिएको छ । लामो समयको डेडलकपछि अहिले दुवै पक्षबीच सहमतिको सम्भावना अघि बढेको हो ।

यसैबीच अमेरिकी विदेशमन्त्री एन्टोनी ब्लिंकेनले हमासलाई युद्धविरामको लागि प्रस्ताव पठाइएको र त्यो इजरायलको तर्फबाट उठाइएको असाधारण उदार प्रस्ताव भएको जनाएका छन् । वल्र्ड इकोनोमिक फोरमको बैठकमा भाग लिन साउदी अरेबियाको रियाधमा रहेका उनले भने, “हमासले अब यसबारेमा चाँडै निर्णय गर्नुपर्छ । म आशावादी छु उनीहरूले सही निर्णय लिनेछन् ।”
सीएनएन