बिहार । भारतको बिहारमा सत्तारुढ पार्टी जनता दल (युनाइटेड)का नेता सौरभ कुमारको गोली प्रहार गरी हत्या गरिएको छ । पीटीआइका अनुसार सौरभ कुमार बुधबार राति अबेर विवाहबाट घर फर्कंदै गर्दा पटना नजिक रहेको पुनपुन क्षेत्रमा अज्ञात व्यक्तिले उनीमाथि गोली प्रहार गरेका थिए ।

सब डिभिजन प्रहरी अधिकृत कन्हैया सिंहले समाचार एजेन्सी एएनआइलाई बताए अनुसार सौरभ कुमार आफ्ना एक साथीको साथ रिसेप्सन कार्यक्रममा गएका थिए ।  फर्किनेक्रममा राति सवा १२ बजे मोटरसाइकलमा आएका केही आक्रमणकारीले गोली प्रहार गरेका थिए । 

उपचारका लागि अस्पताल लैजाँदै गर्दा उनको बाटोमै मृत्यु भएको हो । उनीसँगै मुनमुन कुमार पनि घाइते भएका थिए । उनलाई स्थानीय कंकडबाग अस्पतालमा लगिएको जनाइएको छ ।

बिहारका कांग्रेस अध्यक्ष अखिलेशप्रसाद सिंहले कुनै पनि राजनीतिक कार्यकर्ताको हत्या निन्दनीय भएको जनाउँदै सरकारलाई तुरुन्तै यस घटनाको अनुसन्धान गरी दोषीलाई तत्काल कारबाही प्रक्रियामा ल्याउन माग गरेका छन् । बीबीसी