काठमाडौं । इन्डियन प्रिमियर लिग (आईपीएल)मा पञ्जाब किंग्सले छैटौँ हार व्यहोरेको छ । पञ्जाबले आइतबार भएको खेलमा साविक उपविजेता गुजरात टाइटन्सविरुद्ध तीन विकेटको हार व्यहोरेको हो ।
मुल्लानपुरमा पञ्जाबले प्रस्तुत गरेको १४३ रनको लक्ष्य गुजरातले पाँच बल बाँकी छँदै सात विकेट गुमाएर भेट्टायो । गुजरातको जितमा राहुल तेवातियाले ३६ रन बनाए । कप्तान शुभमन गिलले ३५ र साई सुदर्शनले ३१ रन जोड्दा रिद्दिमान साह र अज्मतुल्लाह ओमरजाईले समान १३ रन थपे ।
पञ्जाबका हर्षल पटेलले तीन विकेट लिए । लियम लिभिङ्स्टोनले दुई र साम करन र अर्शदीप सिंहले समान एक विकेट हात पारे ।
त्यसअघि, टस जितेर ब्याटिङमा उत्रिएको पञ्जाबले निर्धारित २० ओभरमा सबै विकेट गुमाएर १४२ रन बनाएको थियो । पञ्जाबका प्रभसिम्रन सिंहले ३५ रन जोडे । हरप्रीत ब्रारले २९, कप्तान साम करनले २०, हरप्रीत सिंहले १४ र जितेश शर्माले १३ रन थपे ।
गुजरातका साई किशोरले चार विकेट लिए । चार ओभर बलिङ गरेका किशोरले ३३ रन खर्चिए । मोहिज शर्मा र नूर अहमेदले दुई/दुई र राशिद खानको नाममा एक विकेट रह्यो ।
जितसँगै आठ खेलबाट आठ अंक जोडेको गुजरात तालिकाको छैटौँ स्थानमा छ । समान खेलबाट चार अंकको पञ्जाब नवौँ स्थानमा छ ।
