काठमाडौं । आफूलाई प्रहरी बताउँदै लुटपाटमा संलग्न रहेको आरोपमा दुईजना पक्राउ परेका छन् । पक्राउ पर्नेमा काभ्रेको तिमाल गाउँपालिका–७ का सन्देश तामाङ र काभ्रेकै रोशी गाउँपालिका–३ का ३१ वर्षीय हिरालाल तामाङ रहेका छन् ।

प्रहरीका अनुसार उनीहरूले गएको चैत २ गते काठमाडौंको गोकर्णेश्वर नगरपालिका–५ स्थित यज्ञमार्टको क्याफेमा चिया पिइरहेका सप्तरीको राजविराजका २४ वर्षीय विजय गोइतलाई धम्की दिएका थिए ।

उनीहरूले गोइतलाई आफूहरू सिभिल प्रहरी भएको बताएका थिए । "तपाईंले सुनको अवैध कारोबार गर्नुहुन्छ भन्ने हामीलाई सूचना आएको छ," प्रहरीका अनुसार उनीहरूलाई गोइतलाई भनेका थिए ।

उनीहरूले गोइतलाई चेकजाँच गरेर उनको साथमा रहेको ४० हजार रुपैयाँ लगेका थिए । त्यतिमात्र नभएर उनीहरू गोइतको कोठामै गएर १८ ग्रामको सुनको रिङ र सोको बिलसमेत लुटपाट गरेको प्रहरीले बताएको छ ।

उनीहरूलाई वैशाख २ गते नयाँ बस्तीबाट पक्राउ गरिएको हो ।