मस्को । युक्रेन युद्धका क्रममा अहिले सम्म रुसका ५० हजार भन्दा बढी सेनाको मृत्यु भएको अनुमान गरिएको छ । 

यो युद्धको दोस्रो वर्ष रुसले तबाही मच्चाउने खालको रणनीतिमा जोड दिएको थियो ।  एक अध्ययन टोलीको अनुसन्धानका अनुसार अघिल्लो वर्ष भन्दा यो वर्ष ज्यान गुमाउने रुसी सैनिकको संख्या २५ प्रतिशतले बृद्धि भएको छ । 

बीबीसी रसियन, स्वतन्त्र मिडिया समूह ‘मिडियाजोन’ र स्वयंसेवक सबै मिलेर फ्रेबुवरी २०२२ देखि नै मर्ने रुसी सैनिकको गणना थालेका थिए । अध्ययन टोलीका अनुसार आधिकारिक रिपोर्टमा स्वतन्त्र रुपले उपलब्ध जानकारी, अखबार तथा सोसियल मिडियाको पनि अध्ययन गरिएको थियो । 

सो अध्ययन अनुसार युक्रेनमा युद्धको दोस्रो साल २७ हजार ३सय रुसी सेनाले ज्यान गुमाएका थिए ।  यो तथ्यांकको बारेमा रुसले भने कुनै टिप्पणी गर्न इन्कार गरेको छ ।  रुसले एकपटक मात्रै मारिने सेनाको संख्या सन २०२२मा बताएको थियो । 

त्यो संख्या भन्दा अहिले देखिएको संख्या ८ गुणा बढी हो । युक्रेनले पनि मारिने सेनाको बारेमा नियमित जानकारी दिएको छैन ।  गएको फेब्रुअरीमा त्यहाँका राष्ट्रपति भ्लादिमिर जेलेन्स्कीले ३१ हजार युक्रेनी सेनाको निधन भएको जनाएका थिए । 

तर, अमेरिकी खुफिया एजेन्सीले युक्रेनी सेना यो भन्दा बढी संख्यामा मारिएको  जनाएको थियो । (बीबीसी)