भक्तपुर । नयाँ वर्षको अवसरमा भक्तपुरमा आठ दिन नौ रातसम्म भव्य रूपमा मनाइने विश्व प्रसिद्ध बिस्काः जात्रा अर्थात् बिस्केट जात्रा हेर्न मानवसागर उर्लिएको छ । वैशाख १ गते ल्यासिंखेलमा उठाइने अष्टमात्रिका गणसहित लिंगो जात्रा हेर्न भक्तपुरलगायत उपत्यकाका विभिन्न ठाउँबाट हजारौँ मानिस आएका हुन् ।

बिहानैदेखि चुपिन घाटमा स्नान गरेर ल्यासिंखेलमा दर्शन गर्न आउनेको भीड लागेको छ । हिजो (चैत ३०) साँझ ७ बजेर ३० मिनेटमा हजारौँ व्यक्तिका अगाडि यहाँका बासिन्दाले ५५ हात लामो योसिङ द्यः अर्थात् लिंगो उठाएकामा शनिबार दिनभर जात्रा गरेर साँझ विधिपूर्वक पूजा गरी तान्त्रिक विधि पुर्‍याएर लिंगो ढालिने परम्परा छ ।

लिंगोको कोखा (टुप्पो)मा नाग र नागिनीको प्रतीकस्वरूप दुईवटा ध्वजा बाँधेर अष्टमात्रिकाका प्रतीक आठवटा डोरीले तानेर उक्त लिंगो उठाउने प्रचलन छ । आठवटा मोटा एवं लामो डोरी बाँधेर चारैतिरबाट गोलाकार रूपमा बसेर लिंगोलाई योसिंको प्वालमा छिराएर वरिपरिबाट डोरीको माध्यमले तानेर ठड्याइने गरिन्छ । रासस