काठमाडौं । युक्रेनका राष्ट्रपति भ्लादिमिर जेलेन्स्कीले रुस र क्रिमियालाई जोड्ने पुल भत्काउने लक्ष्य रहेको बताएका छन् । सन् २०२२ को फेब्रुअरी २४ मा रुसले युक्रेनमा आक्रमण गरेयता दुई देशबीच युद्ध जारी छ ।
त्यसयता युक्रेनी अधिकारीहरूले रुसका लागि महत्त्वपूर्ण रहेको १९ किलोमिटर लामो पुल भत्काउने धम्की दिँदै आएका छन् । यो पुल रुसका लागि सैनिक र अन्य हिसाबले पनि महत्त्वपूर्ण छ ।
यसबीच सोमबार जेलेन्स्कीले जर्मन मिडिया जायन्ट एक्सेल स्प्रिंगरको स्वामित्वमा रहेको सञ्चारमाध्यमसँग बोल्दै यस्तो टिप्पणी गरेका हुन् । उनले भनेका छन्, “हामी वास्तवमै रुसी पूर्वाधार नष्ट गर्न चाहन्छौँ । कुरा केवल केर्च (क्रिमिया)को पुलको बारेमा होइन । हामी सैन्य पूर्वाधार, पुलहरू र एयरफिल्ड नष्ट गर्ने कुरा गर्दैछौँ ।”
सन् २०१६ देखि २०१८ को बीचमा बनेको क्रिमियन पुल क्रिमिया प्रायद्वीप र मुख्य भूमि रुसलाई जोड्ने एक मात्र सडक र रेलमार्ग हो ।
