युक्रेन । युक्रेनकी ९८ वर्षीया वृद्धा लिडिया लोमिकोभ्स्का अहिलेको रुसी आक्रमण दोस्रो विश्वयुद्धभन्दा पनि खराब भएको बताउँछिन् । उनले त्यतिबेला दोस्रो विश्वयुद्धको अनुभव गरेकी थिइन् । र, अहिले पनि उनले रुसी आक्रमण बेहोर्नु परिरहेको छ ।
जब रुसी सेना पूर्वी युक्रेनमा रहेको ओचेरेटिनस्थित उनको घरमा छिर्यो, उनी र उनको परिवारले त्यहाँबाट हिँड्नु उपयुक्त ठान्यो । तर, भीषण गोलाबारीका कारण लिडिया उनको परिवारको सम्पर्कबाट बाहिर पुगिन् र चप्पल लगाएकै अवस्थामा उनी पश्चिमतिर हिँड्न् ।
उनले लौरो टेकेकी थिइन् र आडको लागि काठको एउटा फलेक पनि थियो । उनी बाटो लागिन् । बीबीसीसँगको कुराकानीमा उनले भनिन्, “मेरा खुट्टाले मलाई जसैगरी बोकिरहेका थिए, मैले खुट्टा बोकेकी थिइनँ ।”
उनी १० किलोमिटरसम्म हिँडिरहिन्, जबसम्म उनलाई युक्रेनको प्रहरीले उद्धार गरेन । “त्यहाँ केही रहेको थिएन । सबै तलमाथि थियो,” आफूलाई सवारीसाधन आवश्यक रहेको बताएको सार्वजनिक भिडियोमा उनले भनेकी छन् । उनले छोडेको गाउँ रुसी सेना भित्रिएपछि साह्रै नराम्रो स्थानमा परिणत भएको थियो । उनीहरू जति नजिक आउँथे, त्यति नै धेरै तोप प्रहार गरिरहेका थिए । सबै अपार्टमेन्ट र घरहरू धुलोमा परिणत भएका थिए ।
“जब मैले हिँड्न सुरू गरेँ, केही समय म भूइँमा पल्टेर बसेँ,” उनले भनिन्, “मैले एकपटक सन्तुलन गुमाएँ र घाँसमा लडेँ । एकपटक सुतेँ र यात्रा जारी राखेँ ।’
उनका अनुसार एकपटक एक अफिसरले उनलाई सोधे, “कति वर्षको हुनुभयो ? मैले जवाफ दिएँ– ४८ वा ४९ । “उनले मलाई विश्वास गरेनन्,” हाँस्दै उनले भनिन् ।
उनलाई नातिनी स्भितलानासँग पुनर्मिलन गराउनुअघि आरामको लागि केही समय सेल्टरमा लगियो । “त्यहाँ हजुरआमालाई देखेर म निकै खुसी भएँ,” स्भितलानाले भनिन् । बीबीसी
