काठमाडौं । मोन्टेरीसँग दोस्रो लेगमा ३–१ ले पराजित भएपछि लियोनल मेसीको कप्तानीमा रहेको इन्टर मियामी कोन्काकाफ च्याम्पियन्स कपको क्वार्टरफाइनलबाटै बाहिरिएको छ ।

बिहीबार स्टाडियो बीबीभीएमा भएको खेलमा मोन्टेरीलाई जित दिलाउन ब्रान्डन भाज्क्वेज, जर्मन बेर्टेरम र जिसस गाल्लार्डोले गोल गरे । मियामीका डियागो गोमेजले एक गोल फर्काए ।

खेलको ३१औँ मिनेटमा भाज्क्वेजको गोलमा मोन्टेरीले अग्रता बनाएको थियो । ५८औँ मिनेटमा बेर्टेरमले गोल गरेपछि मोन्टेरीले अग्रता दोब्बर बनायो । ६४औँ मिनेटमा गाल्लार्डोले गोल गर्दै मोन्टेरीको अग्रतालाई ३–० मा पुर्याएका थिए ।

मियामीका गोमेजले ८५औँ मिनेटमा गोल फर्काए पनि टिमको हार टार्न सकेनन् । त्यसअघि, ७८औँ मिनेटमा जोर्डी अल्बाले रातो कार्ड व्यहोर्दै मैदान छाडेपछि मियामी १० खेलाडीमा समेटिएको थियो ।

मोन्टेरीले मियामीविरुद्ध समग्रमा ५–२ को जित निकाल्दै प्रतियोगिताको सेमिफाइनलमा स्थान बनाएको हो । पहिलो लेगमा मोन्टेरीले मियामीलाई २–१ ले हराएको थियो ।