काठमाडौं । आर्थिक वर्ष २०६६/६७ मा सुरु भएको हुलाकी राजमार्गको काम १५ वर्षको अवधिमा ६५ प्रतिशतमात्रै भएको छ । प्रतिनिधिसभाको सार्वजनिक लेखा समितिमा हुलाकी राजमार्ग आयोजना निर्देशक अजयकुमार मुलले गरेको प्रस्तुति अनुसार हालसम्म ६५.२२ प्रतिशत भौतिक प्रगति भएको हो ।

हालसम्म ६१ अर्ब ६९ करोड रुपैयाँ खर्च भएको पनि मुलले बताए । उनका अनुसार कुल सडकमध्ये १२४३ किलोमिटर (किमि) सडक कालोपत्र भएको छ ।

त्यस्तै, १३५ वटा पुल निर्माण सम्पन भएको छ । उनका अनुसार चालु आर्थिक वर्षमा ५० वटा पुलहरू निर्माण र ४२ किमि सडक निर्माणको ठेक्का व्यस्थापनका लागि बहुवर्गीय सहमति तथा स्रोत सुनिश्चितताका लागि काम अगाडि बढाइएको छ ।

हुलाकी राजमार्गलाई प्रमुख व्यापारिक मार्गका रूपमा हेरिएको छ । पूर्व–पश्चिम राजमार्गको विकल्पका रूपमा हेरिएको यो सडकको कुल लम्बाइ १८५७.४२ किमि छ ।

चितवन राष्ट्रिय निकुञ्ज क्षेत्रको ५३ किमि, कपिलवस्तु–दाङ सिमाना क्षेत्रमा ३० किमि र दाङ–बाँके सिमाना क्षेत्रमा ६३ किमिसहित २३० किमि सडक र ९६ वटा पुल निर्माणको काम सुरु भएको पनि उनले समितिमा जानकारी गराए ।  

उनका अनुसार आगामी चार वर्षमा यो सडक निर्माण सम्पन्न गर्न ४९ अर्ब रुपैयाँ आवश्यक पर्नेछ । चालु आर्थिक वर्ष २०८०/८१ को बाँकी अवधिका लागि ६ अर्ब, आगामी आर्थिक वर्ष २०८१/८२ मा ११ अर्ब, आर्थिक वर्ष २०८२/८३ मा २१ अर्ब र आर्थिक वर्ष २०८३/८४ मा थप ११ अर्ब रुपैयाँ व्यवस्थापन हुन सके हुलाकी राजमार्गको काम सम्पन्न हुने निर्देशक मुलको भनाइ छ ।  

हुलाकी राजमार्गअन्तर्गत सातवटा कार्यालय छन् । जसमा इटहरी कार्यालयले झापा, मोरङ, सुनसरी र सप्तरी हेर्छ । त्यसैगरी जनकपुर कार्यालयले सिराहा, धनुषा, महोतरी र सर्लाही जिल्लामा पर्ने सडक खण्ड हेर्छ ।

वीरगन्ज कार्यालयले रौतहट, बारा, पर्सा र चितवन जिल्लामा पर्ने सडकखण्ड, कपिलवस्तु कार्यालयले पूर्वी/पश्चिम नवलपरासी, रूपन्देही र कपिलवस्तु, नेपालगन्ज कार्यालयले दाङ, बाँके र बर्दिया, धनगढीले कैलाली र कञ्चनपुर जिल्लामा पर्ने सडक खण्ड हेर्छ । त्यसका साथै सडक डिभिजन भरतपुरले चितवन जिल्लाको माडी, भरतपुर खण्ड ४५ किमि हेर्ने जानकारी दिइएको छ ।