काठमाडौं । कतिपय व्यक्ति आफ्नो शरीरमा सामान्य लक्षण देखिए पनि त्यसलाई ठूलो रोगसँग जोडेर हेर्ने गर्छन् । सानातिना लक्षणकै आधारमा आफूलाई गम्भीर रोग लागेको शंका गर्ने, यसबारे खोज्न थाल्ने, फरकफरक चिकित्सककहाँ परीक्षण गराउने, चिकित्सकको सल्लाहविना नै विभिन्न परीक्षण गराउनेजस्ता बानी व्यक्तिमा बढ्दै जान्छन् । 

व्यक्तिले सामान्य लक्षणलाई ठूलो रोगसँग जोडेर हेर्ने र मर्छु कि भन्ने डरले भौँतारिने बानी मात्रै नभएर एक प्रकारको मानसिक समस्या हो । यो मस्तिष्कसँग जोडिएको हाइपोकोन्ड्रियासिस नामक समस्या भएको बताउँछन्, नसा तथा मानसिक रोग विशेषज्ञ डा. प्रदीप पाण्डे । 

उनका अनुसार यो समस्यामा व्यक्तिले टाउको दुःख्ने, हातखुट्टा झमझम गर्ने तात्ने, घाँटीमा केही अड्किएजस्तो हुने, ग्यास्ट्रिक बढ्नेजस्ता लक्षणलाई पनि मुटुरोग, क्यान्सरजस्ता रोगहरूसँग जोडेर हेर्ने गर्छ । 

हाइपोकोन्ड्रियासिस यस्तो समस्या हो, जसमा व्यक्तिलाई मानसिक रोगका लक्षण नदेखिने तर शारीरिक लक्षणहरू महसुस गर्ने अवस्था हुन्छ । यो समस्यामा बिरामीले सबै परीक्षण रिपोर्ट नर्मल आए पनि चित्त नबुझ्ने, विभिन्न परीक्षण गराउन पुग्नेजस्ता रिपोर्ट व्यवहार देखाउँछन् । 

पछिल्लो समय आफूकहाँ हाइपोकोन्ड्रियासिसको समस्या लिएर आउने बिरामीको संख्या बढिरहेको डा. पाण्डे बताउँछन् । बिरामीलाई आफूमा मानसिक रोग भएको थाहा नहुने खाली शारीरिक लक्षण मात्रै महसुस गर्ने गरेको उनको अनुभव छ ।

अधिकांश बिरामीले गुगल, युट्युबबाट आफैँले आफ्नो रोग पत्ता लगाउन खोज्दा समस्या झन जटिल बनाइरहेको उनको अनुभव छ । सबै परीक्षण रिपोर्ट नर्मल भए पनि व्यक्तिमा ठूलो रोग छ भन्ने डर महसुस भएमा वा माथिकामध्ये कुनै पनि लक्षण देखिएमा मानसिक रोग विशेषज्ञबाट परामर्श लिन डा. पाण्डेको सुझाव छ । 

यस्ता बिरामीलाई विशेषज्ञले विभिन्न थेरापीको माध्यमबाट उपचार गर्दछन् ।