काठमाडौं । उपप्रधान एवं भौतिक पूर्वाधार तथा यातायातमन्त्री रघुवीर महासेठले सरकारले निर्माणाधीन आयोजना छिटो सम्पन्न गर्न नयाँ सोचका साथ काम गरिरहेको बताएका छन् । सिरहा र धनुषा जोड्ने कमला नदीको पुल निरीक्षणका क्रममा आइतबार उनले यस्तो बताएका हुन् ।

निर्माणाधीन आयोजना पहिलो चरणमा सम्पन्न गर्ने नयाँ प्रकारको सोचसहित सरकार अघि बढेको उनले उल्लेख गरे । उनले पुल, सडकलगायत निर्माणाधीन आयोजना पहिलो चरणमा सम्पन्न गरेपछि मात्र नयाँ योजना अघि सार्ने रणनीतिसहित आफूहरू अघि बढेको बताए ।

उनले आउँदो असार मसान्तभित्र कमला नदीको पुल र हुलाकी राजमार्गको काम पूरा गर्न निर्देशन दिए । असार मसान्तसम्म काम पूरा नभए सडक विभागले कुनै पनि कदम चाल्ने उनले चेतावनी समेत दिए ।

“...गल्ती भएको कुरा सच्याउन भनेका छौँ । असारभित्र सम्पन्न गर्ने गरी अन्तिम निर्देशन गरेका छौँ,” उनले भने, “हुलाकी सडकलाई पनि दिएका छौँ । यदि, असार मसान्तभित्र पूरा भएन भने सडक विभागले कुनै पनि स्टेप चाल्न सक्छ ।”

निरीक्षणका क्रममा हुलाकी राजमार्ग योजना कार्यालय, जनकपुरका योजना प्रमुख कृष्णकुमार महतोले राजपत्रमा प्रकाशित नहुँदा र लगत कट्टा हुन नसक्दा समस्या झेल्नुपरिरहेको बताए । उनले सडक सिमाना स्पष्ट नहुँदा पनि कतिपय समस्या आइरहेको सुनाए ।

उनले निर्माण सामग्री समयमा नआइपुग्ने, विद्युत्का पोलहरूको समस्या, स्थानीय तह मातहतबाट निर्माण सामग्री लिनुपर्ने कारणले गर्दा केही ढिला भएको बताए । न्युज एजेन्सी नेपाल