काठमाडौं । प्रहरीले पाल्पाको रिब्दिकोटकी १९ वर्षीया पद्मा सुनारको हत्या आरोपीलाई पक्राउ गर्न सफल भएको छ । पद्माको हत्या आरोपमा पाल्पा ख्याहा लप्सीखोलाका १९ वर्षीय सागर भन्ने देवलाल सार्कीलाई पक्राउ गरिएको जिल्ला प्रहरी कार्यालय पाल्पाका प्रहरी उपरीक्षक (एसपी) नरेन्द्र चन्दले बताए । 

रिब्दिकोट गाउँपालिका–१, ख्याहाकी पद्माको मंगलबार धारिलो हतियार प्रयोग गरी हत्या भएको थियो । घरभन्दा दुई किलोमिटर टाढाको लप्सीखोलामा लुगा धुन गएका बेला उनको हत्या भएको थियो । 

बिहान ९ बजे लुगा धुन घरबाट हिँडेकी पद्माको शव दिउँसो साढे २ बजे मात्रै फेला परेको थियो । पद्माले धोएर ल्याएको लुगा घर नजिकैको गोरेटोबाटोमा छरपस्ट अवस्थामा फेला परेपछि उनलाई स्थानीयले खोजी गरेका थिए । पद्माको शव बाटोभन्दा २० मिटर तल खरबारीमा टाउको, घाँटी र हातमा गम्भीर चोट लागेको अवस्थामा फेला पारिएको प्रहरीले जनाएको छ । 

घटना शंकास्पद देखिएपछि प्रहरीले भैरहवाबाट तालिम प्राप्त कुकुर झिकाएर अनुसन्धान गरेको थियो । घटनाको अनुसन्धानका लागि एसपी चन्दसहितको टोली घटनास्थलमा पुगेका थिए । हत्याको भोलिपल्ट (बुधबार) मात्रै पुगेको तालिमप्राप्त कुकुरले कुनै 'क्ल्यु' फेला पार्न सकेन । हत्यालगत्तै आरोपी देवलालले हत्या गर्न प्रयोग गरिएको धारिलो हतियार, हत्या गर्दा लगाएको लुगा पानीले पखालेका थिए । 

कुकुरले समेत पत्ता नलगाएपछि आरोपी पक्रन प्रहरीमाथि स्थानीयको दबाब थप बढ्न थाल्यो । त्यसपछि एसपी चन्दसहित घटनास्थल नजिकका प्रहरी चौकीहरू सर्देवा, हार्थोक, अर्गलीमा कार्यरत प्रहरीको टोली थप अनुसन्धानमा जुटे । सोही टोलीले घटनाको दुई दिनपछि आरोपी देवलाललाई पक्राउ गर्न सफल भयो । हत्याका आरोपी देवलालमाथि थप अनुसन्धान जारी रहेको एसपी चन्दले बताए । “प्रारम्भिक अनुसन्धानका क्रममा आवेगमा आएर हत्या गरेको बयान आरोपीले दिएका छन् । हामी थप अनुसन्धान गर्दैछौँ,” एसपी चन्दले भने ।

मोबाइलको टेम्पर ग्लासले खुल्यो हत्यारा
भैरहवाबाट झिकाएको तालिम प्राप्त कुकुरले समेत कुनै क्लु फेला नपारेपछि अनुसन्धान गर्न प्रहरीमाथि नै चुनौती थपिएको थियो । 

घटनाको प्रकृतिले पद्माको हत्या भएको स्पष्ट संकेत गरिसकेको थियो । प्रहरीले घटनास्थल नजिकका आफन्तहरूसँग पद्माको गतिविधिबारे सोधपुछ जारी राख्यो । पद्माले प्रयोग गर्ने मोबाइल समेत घटनास्थलमा फेला परेको थिएन । जसकारण उनको फोनमार्फत प्राविधिक विश्लेषण गर्न प्रहरीलाई सम्भव भएन । दिनदहाडै भएको हत्याका आरोपी पक्रन प्रहरीले छिमेकीको साथ खोजे । प्रहरीले हत्यामा प्रयोग भएका हतियार भेटिनसक्ने भन्दै छिमेकीका घरगोठमा ‘सर्च’ गर्न थाले । 

छिमेकीका घरगोठमा प्रहरीले कुनै धारिलो हतियार फेला पार्न सकेनन् । प्रहरी अनुसन्धानकै क्रममा देवलालको घरमा पुगे । देवलाल घरमा थिएनन् त, उनको भैँसीगोठमा ‘सर्च’ गर्ने क्रममा प्रहरीले मोबाइलको स्क्रिन जोगाउन प्रयोग गरिने ‘टेम्पर ग्लास’ फेला पार्‍यो । 

प्रहरीले उक्त ‘टेम्पर ग्लास’ हत्या गरिएकी पद्माको मोबाइलको हुनसक्ने आशंका गरे । प्रहरीले घरभन्दा केही पर ढुंगा फुटाउन गएका देवलाललाई नियन्त्रणमा लिएर सोधपुछ गर्न थाले । सुरुमा हत्या इन्कार गरेका देवलालले पछि हत्या गरेको स्वीकार गरे । 

प्रहरीसँग बयानमा उनले लुगा धुदा पद्मासँग सामान्य विवाद भएको र आफूलाई गाली गरेपछि आवेगमा आएर हत्या गरेको बताएका छन् । उनले घर फर्किंदै गर्दा पछाडिबाट हसिया प्रहार गरेर हत्या गरेको स्वीकार गरेका हुन् । पद्माको मोबाइल समेत देवलालको कोठाबाट प्रहरीले बरामद गरेको छ । मोबाइलबाहेक प्रहरीले पद्माको हत्या गर्न प्रयोग गरिएको हसिया, धोइ पखाली गरेका लुगा समेत बरामद गरिएको प्रहरीले जनाएको छ ।