काठमाडौं । भुक्तानी प्रणाली सञ्चालक फोन पे र जीएलएन इन्टरनेसनल कोरियाबीच क्रस–बोर्डर क्यूआर भुक्तानी सम्बन्धी समझदारी पत्रमा हस्ताक्षर भएको छ । जीएलएन इन्टरनेसनल कोरियाको विश्वव्यापी भुक्तानी नेटवर्क प्रदान गर्ने कम्पनी हो ।

दुई कम्पनीबीच भएको एमओयू सम्झौता अनुसार क्रस–बोर्डर भुक्तानी सेवा प्रदान गर्न आवश्यक नियामक, प्राविधिक र व्यावसायिक सम्भाव्यतामा काम गरिने भएको छ ।

फोनपे  र जीएलएनको सहकार्यसँगै कोरियाबाट नेपाल आउने पर्यटकले नेपालमा क्यूआरमार्फत  भुक्तानी गर्न सक्नेछन् ।

कोरियाबाट नेपाल आउने जीएलएन प्रयोगकर्ताले हाना वानक्यू, केबी वालेट, आईएमबैंक, टस, हाना मनी र जीएलएन लगायत बैंकिङ एपमार्फत फोन पेको क्यूआरमा भुक्तानी गर्न सक्नेछन् ।

जीएलएनका सीईओ क्युङहो किमले यो सहकार्यले आफू उत्साहित रहेको बताए । "विश्वभर क्रस–बोर्डर भुक्तानी सेवा प्रदान गर्ने प्रतिबद्धता अनुरूप जीएलएन र फोन पेसँग यो सहयोगी यात्रामा म उत्साहित छु," जीएलएनका सीईओ क्युङहो किमले भने।

फोन पेका सीईओ दिवस कुमारले यो कदमले वित्तीय समावेशिता बढाउन र नेपाललाई सफल डिजिटल अर्थतन्त्र बनाउन सहयोग गर्ने विश्वास व्यक्त गरेका छन् ।

"जीएलएनसँग सहकार्य गरेर हाम्रो सेवालाई कोरियाली पर्यटकहरूमा विस्तार गर्न उत्साहित छौँ," फोन पेका सीईओ दिवस कुमारले भने ।