काठमाडौं । घरेलु मैदानमा जारी ट्वान्टी–२० क्रिकेट शृंखलाको दोस्रो खेलमा आयरल्यान्ड वुल्भ्सविरुद्ध नेपालका गुल्सन झा अर्धशतक बनाउनबाट चार रनले चुकेका छन् । कीर्तिपुरस्थित त्रिवि क्रिकेट मैदानमा जारी खेलमा टस जितेर ब्याटिङमा उत्रिएको नेपालका गुल्सन चौथो विकेटका रूपमा आउट भएका हुन् ।

१३.५ ओभरमा आउट हुनुअघि गुल्सनले नेपाली टिमको खातामा ४६ रन जोडे । उनले ३२ बलमा एक चौका र चार छक्का प्रहार गरे ।

जारी खेलको १४ ओभर सकिँदा नेपालले चार विकेट गुमाएर १२९ रन बनाएको छ । शृंखलाको यो दोस्रो खेल हो । पहिलो खेलमा नेपालले आयरल्यान्ड वुल्भ्सलाई ६ विकेटले हराएको थियो ।

नेपाल ‘ए’ले आयरल्यान्ड वुल्भ्ससँग पाँच ट्वान्टी–२० र तीन एकदिवसीय खेलको शृंखला खेल्ने तालिका छ । सुरुका दुई ट्वान्टी–२० रोहितकुमार पौडेलको नेपाली सिनियर टिमले खेल्नेछ । बाँकी खेल विनोद भण्डारीको कप्तानीमा रहेको नेपाल ‘ए’ले खेल्नेछ ।