काठमाडौं । हेटौँडामा रहेको युनिलिभर नेपालको कारखानाले हालै युनिलिभर दक्षिण एसियामा पहिलो प्रकारको विद्युतीय बोयलर सञ्चालनमा ल्याएको छ । यो विद्युतीय हिटर स्टिम उत्पादन गर्ने प्रविधि हो ।

यसले जीवाष्म इन्धनको प्रयोग अन्त्य गर्दै स्वच्छ ऊर्जातर्फ युनिलिभरले कदम चालेको संकेत गरेको छ ।

युनिलिभरले आफ्नो कारखानामा हाल ९० प्रतिशत स्वच्छ ऊर्जा प्रयोग हुने गरेको बताएको छ । जसमध्ये २० प्रतिशत सौर्य र बाँकी ७० प्रतिशत जलविद्युत्‌को बिजुली रहेको छ ।

पछिल्लो एक वर्षमा युनिलिभर नेपालको कारखानाले ६ करोड रुपैयाँको लगानीमा कार्बनडाइक्साइड उत्सर्जन कम गर्न धेरै नयाँ प्रविधि स्थापना गरेको बताएको छ ।

कम्पनीले यसलाई ‘नेट जिरो’तर्फको कदम भनेको छ । निकट भविष्यमा डिजेल जेनेरेटर चलाउन बायोडिजेल प्रयोग गर्दै साइटलाई एक सय प्रतिशत हरित ऊर्जासहित सञ्चाल गर्ने कम्पनीको लक्ष्य छ ।

कम्पनीका प्रबन्ध निर्देशक तथा सीईओ अमलन मुखर्जीले युनिलिभरको सञ्चालनलाई नेट जिरोतर्फ लैजान प्रतिबद्ध रहेको बताएका छन् ।