काठमाडौं । समुदायस्तरमा अहिले रुघाखोकी, ज्वरो, घाँटी दुख्नेजस्ता स्वास्थ्य समस्या देखिरहेको छ । कतिपयमा यी लक्षण एक सातासम्म पनि निको नभएको पाइन्छ ।

यी लक्षणलाई मौसम परिवर्तनको प्रभावको रूपमा पनि बुझेको पाइन्छ । तर, विज्ञहरूले यसलाई फ्लू (इन्फ्लुएन्जा) र कोरोनाको असर भनेका छन् ।

वरिष्ठ संक्रामक रोग विशेषज्ञ डा. शेरबहादुर पुन यस मौसममा फ्लू र कोरोनाले धेरैलाई सताइरहेको बताउँछन् । यी दुई संक्रमण सँगसँगै रहेकाले घाँटी दुख्ने, लामो समय रुघाखोकी निको नहुने, ज्वरो, स्वाद गन्ध हराउने, शरीर दुख्नेजस्ता लक्षण भएका बिरामी समुदायस्तरमा देखिएको उनी बताउँछन् ।

राष्ट्रिय जनस्वास्थ्य प्रयोगशालाअन्तर्गत नेसनल इन्फ्लुएन्जा सेन्टरका युनिट इन्चार्ज लोकबन्धु चौधरी मार्चयता इन्फ्लुएन्जा बढेको र फाट्टफुट्ट कोरोनाका केस पनि देखिएको बताउँछन् । 

तथ्यांकले के भन्छ ?

राष्ट्रिय जनस्वास्थ्य प्रयोगशाला (एनपीएचएल)ले सातै प्रदेशमा रहेका जनस्वास्थ्य प्रयोगशला तथा देशभरका १५ वटा हब अस्पतालहरूबाट इन्फ्लुएन्जाको विवरण संकलन गर्ने गर्छ । एनपीएचएलले १ देखि १० मार्चसम्म परीक्षण गरेका दुईहजार ९० नमुनामध्ये इन्फ्लुएन्जा पोजिटिभ देखिने दर १६.१ प्रतिशत छ । यस्तै, कोरोना पोजिटिभ दर ४.१ प्रतिशत छ ।

मार्चयता इन्फ्लुएन्जा 'ए' अन्तर्गतको 'एच वान एन वान पीडीएम ०९' बढी सक्रिय भएको सर्भिलेन्स रिपोर्टमा उल्लेख छ ।

सामान्यतया नेपालमा जुलाई र मार्चमा इन्फ्लुएन्जा एच वान एन वान पीडीएम ०९, इन्फ्लुएन्जा ए एच ३ तथा इन्फ्लुएन्जा 'बी'का कारण धेरैमा संक्रमण हुने गरेको उनको अनुभव छ ।

कुनै वर्ष केस धेरै देखिने गरेको र सन् २०२४ मा पनि 'एच वानएन वान पीडीएम ०९' बढी फैलिएको चौधरी बताउँछन् ।

इन्फ्लुएन्जाको संक्रमण भएमा ज्वरो आउने, रुघाखोकी लाग्ने, सिँगान आउने, घाँटी दुख्नेजस्ता लक्षण देखिन्छन् ।

कतिपय बालबालिका, वृद्धवृद्धा तथा रोग प्रतिरोधी क्षमता कम भएका व्यक्तिलाई भने यसले सिकिस्त बताउने पनि डा. पुन बताउँछन् ।

डब्लूएचओका अनुसार इन्फ्लुएन्जा 'ए'का लक्षण एक देखि दुई सातासम्म पनि देखिन सक्छन् ।

कोरोना पनि सँगसँगै

फेब्रुअरी र मार्चमा इन्फ्लुएन्जा बढेर जाने डा. पुनको पनि अनुभव छ । तर, इन्फ्लुएन्जा सँगसँगै कोरोना संक्रमण पनि फैलिएको डा. पुन बताउँछन् ।

तर, सामान्य लक्षण देखिए बिरामी अस्पतालसम्म आइनपुग्ने उनी बताउँछन् । यस्तै, ओमिक्रोनकै उपप्रजातिहरूले संक्रमण गराइरहेको र ती कमजोर रहेकाले पनि जटिलता नदेखिएको उनको अनुभव छ ।

कतिपय वृद्धवृद्धा, दीर्घरोगीमा स्वाद र गन्ध हराउने, शरीर दुःख्ने समस्या लिएर पनि अस्पताल आइपुग्ने गरेको डा. पुन बताउँछन् ।