काठमाडौं । सत्ता गठबन्धनले खेलकुद विकासको गुरुयोजनाहित विभिन्न खेलका आधुनिक पूर्वाधार निमार्ण गर्ने जनाएको छ ।

सिंहदरबारस्थित प्रधानमन्त्री तथा मन्त्रिपरिषद्को कार्यालयबाट मंगलबार गठबन्धनको साझा न्यूनतम कार्यक्रम सार्वजनिक गर्दै एमाले उपाध्यक्ष विष्णु पौडेलले खेलकुद विकासको गुरुयोजनाहित क्रिकेटसहित खेलका लागि आधुनिक पूर्वाधार निमार्ण गरिने बताए ।

न्यूनतम साझा कार्यक्रममा युवा तथा खेलकुदमा युवालाई सामाजिक जीवनका सबै क्षेत्रमा महत्त्वपूर्ण साझेदार र संवाहकको रूपमा अघि बढाइने उल्लेख छ ।

सत्ता गठबन्धनले क्रिकेटलाई विशेष जोड दिएको देखिन्छ । न्यूनतम साझा कार्यक्रममा अरू खेलको नाम समावेश छैन । तर, क्रिकेटलाई प्राथमिकता दिइएको छ ।

“युवाहरूलाई सामाजिक जीवनका सबै क्षेत्रमा महत्त्वपूर्ण साझेदार र संवाहकका रूपमा अगाडि बढाउँदै उनीहरूको सर्वतोमुखी विकासका लागि वातावरण निर्माण गर्ने । युवालाई राजनीतिक, आर्थिक, सामाजिक तथा सांस्कृतिक रूपान्तरणको अभियन्ता र संवाहकका रूपमा विकास गर्ने । युवापङ्क्तिलाई राष्ट्रिय जीवनका सबै आयाममा परिचालन गर्ने । खेलकुद विकासका गुरुयोजनासहित क्रिकेटलगायतका खेलका लागि आधुनिक पूर्वाधार निर्माण गर्ने, खेलाडीहरूको सम्मान र वृत्ति विकासका कार्यक्रमहरू ल्याउने,” न्यूनतम साझा कार्यक्रममा उल्लेख छ ।