काठमाडौं । प्रतिनिधिसभा बैठकमा भन्सार विधेयक २०८० माथि सैद्धान्तिक छलफल भएको छ । मंगलबार बसेको सभाको बैठकमा सांसदहरूले विधेयकमाथिको सैद्धान्तिक पक्षमा छलफल गरेका हुन् ।
बैठकमा अर्थमन्त्री वर्षमान पुनले भन्सार विधेयकमाथि विचार गरियोस् भन्ने प्रस्ताव प्रस्तुत गरेका थिए । छलफलमा बोल्दै सांसद प्रदीप यादवले तस्करीको काजु अर्थमन्त्रीले खाइरहेको बताए । उनले भन्सार हुकुमी शैलीमा चलेको भन्दै स्वदेशी उत्पादन प्रोत्साहन हुनुपर्ने बताए ।
सैद्धान्तिक छलफलमा भाग लिएका सांसद प्रभु शाहले विधेयक भन्सार (राजस्व) उठाउन हो कि लुट्नका लागि भन्दै प्रश्न गरे । उनले विधेयकमा रहेको कथित पुरस्कार वितरणको व्यवस्था खारेज गर्न माग गरे । विधेयकमा पर्याप्त संशोधन आवश्यक भएको उल्लेख गरे ।
सांसद गोकुलप्रसाद बाँस्कोटाले विधेयक ढिला गरी आएको बताए । पारदर्शीतामा नेपाल फितलो भएको भन्दै उनले वैदेशिक स्रोत परिचालनमा समेत समस्या परेको जिकिर गरे । राजस्व किन कम उठेको भन्दै उनले राजस्व नाकामा पारदर्शीता नभएको, तोकिएका बस्तुको मूल्य फरक भएको लगायत विषय र यसमा जवाफदेहिता ल्याउने गरी विधेयक अघि बढ्नुपर्ने धारणा उनको थियो ।
सांसद नागिना यादवले सीमावर्ती इलाका वा भन्सारमा कुन निकायले चेकजाँच गर्ने भन्दै प्रश्न गरिन् । उनले यस्ता विषयमा विधेयक नबोलेको उनले बताइन् । भन्सारको एक किलो वारी–पारीसम्म सीसीटीभीको व्यवस्था गर्ने, छोटी भन्सार थप्ने र समातिएको सामान जिल्लामा बुझाउने भन्दा छोटी भन्सारमै बुझाउनुपर्ने बताइन् ।
उनले १०० रूपैयाँ बढीको सामानमा कर लिने विषय व्यवहारिक नभएको उल्लेख गरिन् । विधेयकको सैद्धान्तिक पक्षमा बोल्दै सांसद अमरेशकुमार सिंहले भन्सार भएको ठाउँमा राजस्व किन नउठेको, भन्सार कसरी व्यवस्थित गर्ने भन्ने छलफल नभएको जिकिर गरे । भन्सारको ऐन कानुन नै माफियाबाट प्रभावित हुने उनको भनाइ छ । उनले राति १२ बजेदेखि ४ बजेसम्म भन्सारमा माफिया राज चल्ने र यसमा सबैको मिलेमत्तो हुने उनले बताए ।
