काठमाडौं । प्रधानमन्त्री पुष्पकमल दाहाल ‘प्रचण्ड’ले देशमा सुशासनका नयाँ मानक स्थापित हुँदै गरेको बताएका छन् । नयाँ नेपाल निर्माणको नारामा धेरै नेपालीले सहादत प्राप्त गरेको र सयौँ अंगभंग भएको भन्दै धेरै जनताले आश गरेको प्रधानमन्त्रीको नेतृत्वमा देशको अवस्था किन सुधार भएन भन्दै प्रश्न राखेका थिए । 

“देशमा आमुल परिवर्तन गरी नयाँ नेपाल बनाउने अभियानमा धेरै मानिसले ज्यान गुमाए धेरै मानिसहरू अंगभंग भए । यसकै आधारमा हामीले संविधान बनायाँै, त्यो द्वन्द्व व्यवस्थापन विश्वकै लागि उदाहरण बनेको छ,” भण्डारीले भने, “तर, तपाईंकै नेतृत्वमा सरकार हुँदा, सुशासनका समस्या छ । गरिबी अझ बढेको छ, जनता निराश छन् । यस्तो किन भइरहेको छ ?” 

भण्डारीको प्रश्नमा प्रधानमन्त्री प्रचण्डले देशमा सुधारका काम भइरहेको बताए । “विश्वासको मत लिने क्रममा समेत यसबारेमा आफ्ना धारणा राखिसकेको छु । मेरो सरकारको प्राथमिकता नै सामाजिक न्यायसहितको सुशासन हो,” प्रधानमन्त्री प्रचण्डले भने, “हालसम्मका उपलब्धिको रक्षाबाट मात्र संविधानले परिकल्पना गरेका लक्ष्य हासिल हुन्छन् । परम्परागत शैलीबाट काम गरेर लक्ष्य हासिल हुँदैन भन्नेमा प्रष्ट छु ।”

उनले त्यहीकारण सुशासनका मानक स्थापित हुँदै गरेको बताए । “देशमा सुशासनका नयाँ मानकहरू स्थापित हुँदैछन्,” प्रधनमन्त्री प्रचण्डले भने ।