काठमाडौं । प्रमुख प्रतिपक्षी दल नेपाली कांग्रेसले गृहमन्त्री रवि लामिछानेको राजीनामा माग गरेको छ । लामिछानेले जीवी राईसँग मिलेर पोखराको सूर्यदर्शन सहकारीसहित देशका विभिन्न ठाउँमा सहकारी बचतकर्ताको रकम हिनामिना गरेको कांग्रेसले आरोप लगाएको छ । 

मंगलबारको प्रतिनिधिसभा बैठकको सुरुआतमै समय लिएर बोल्दै कांग्रेस सांसद दिपक गिरीले लामिछाने सहकारी प्रकरणको दोषी भएकाले राजीनामाभन्दा अर्को विकल्प हुनै नसक्ने बताए । उनले टालटुले जवाफले नहुने भन्दै कुनै पनि हालतमा राजीनामा चाहिने जिकिर गरे । सांसद गिरीले पूर्वउपराष्ट्रपति नन्दबहादुर पुनको छोरा पक्राउ पर्दा लामिछाने कसरी जोगिए भन्दै प्रश्न गरे ।

साथै उनले सहकारी ठगेर गोरखा मिडिया नेटवर्कमा लगानी गरेको ग्यालेक्सी टीभी खोलिएको आरोप लगाए । लामिछानेविरुद्ध सहकारी ठगी प्रकरणमा अघिल्लो सरकार हुँदा नेपाल प्रहरीले अनुसन्धान बढाएको र तत्कालीन गृहमन्त्री नारायणकाजी श्रेष्ठले समेत छानबिन गर्न अनुमति दिएको भन्दै गिरीले भने, “आफैँले आफैलाई कारबाही गरेको नजिर छैन । मुद्दालाई प्रभावित गरेर अघि बढ्नु काुननी राज्यमा सुहाउँदो हुँदैन र हैन पनि ।” 

यो बेथितिमा अरबौँ हिनामिना भएको भन्दै उनले प्रधानमन्त्रीले उनै लामिछानेलाई किन गृहमन्त्री बनाएको भन्दै प्रश्न गरे । उनले प्रतिपक्षीले जवाफ माग्दा पनि प्रधानमन्त्रीले नदिएको भन्दै आक्रोश पोख्दै भने, “बाहिर फायर साइडमा जवाफ दिएर पुग्दैन यहाँ आएर कुरा राख्नुहोस् भन्दा अपहेलना गरेको कि के गरेको ?”