मुग्लिन (चितवन) । नेकपा (माओवादी केन्द्र) का महासचिव देवप्रसाद गुरुङले नेपालमा अझै वैदेशिक हस्तक्षेप समाप्त नभएको बताएका छन् ।

गोरखाको गण्डकी गाउँपालिका–१ बुटारमा जनसांस्कृतिक महासंघको केन्द्रीय समितिले आयोजना गरेको सांस्कृतिक प्रतिरोध दिवस तथा सम्मान कार्यक्रमलाई सम्बोधन गर्दै महासचिव गुरुङले सबैको त्याग र बलिदानपछि सामन्तवादको अन्त्य भए पनि देशमा अझै  वैदेशिक उत्पीडन, वैदेशिक शोषण र हस्तक्षेपको अन्त्य नभएको बताए ।

महासचिव गुरुङले भने, “मुलुकमा १० वर्षे जनयुद्धपछि जुन परिवर्तन भएको छ । सबैको त्याग र बलिदानका कारण भएको हो, सहिदहरूले लिएको सपना, सहिदहरूले लिएको उद्देश्य सामन्तवादलाई विस्थापित गर्नु मात्र होइन,  वैदेशिक उत्पीडनलाई पनि विस्थापित गर्नु र जनताको बास, गाँस र कपासको ‘ग्यारेन्टी’ गर्नु हो, जसका लागि समाजवादी क्रान्ति आवश्यक छ, एउटै मात्र उद्देश्य पूरा भएको छ सामन्तवादको नेतृत्व गरेको राजतन्त्र विस्थापित भएको छ । तर वैदेशिक हस्तक्षेप विस्थापित भएको छैन ।”

देशमा अझै बहुराष्ट्रिय कम्पनीको प्रभुत्व कायम रहेको र देश आत्मनिर्भरताको दिशातर्फ जान नसकेको उनको भनाइ छ । रासस