काठमाडौं । नेपाली कांग्रेसका प्रवक्ता डा. प्रकाशशरण महतले कपोकल्पित र आधारहीन आरोप लगाएर प्रधानमन्त्री पुष्पकमल दाहाल ‘प्रचण्ड’ले गठबन्धन तोडेको पुनः आरोप लगाएका छन् ।

मंगलबार पार्टी केन्द्रीय कार्यालय सानेपामा पत्रकार सम्मेलन गर्दै उनले प्रधानमन्त्री प्रचण्डले निर्वाचनका समयमा गरिएको प्रतिबद्धता र जनताले दिएको ‘म्यान्डेट’ लत्याएको आरोप लगाए । उनले यस विषयमा पार्टीको कार्यसम्पादन र संसदीय दलको बैठक बसेर गठबन्धन बदल्ने निर्णय बेइमानी र विश्वासघात भएको निष्कर्ष निकालिसकेको जानकारी दिए ।

पूर्वअर्थमन्त्री समेत रहेका डा. महतले संसद्को रोस्ट्रममा उभिएर बोल्दा प्रधानमन्त्री प्रचण्डले लगाएको आरोप कपोकल्पित र बहानाबाजीभन्दा केही नभएको जिकिर गरे ।

“उहाँ (प्रधानमन्त्री प्रचण्ड)ले सदनमा बोल्दा हाम्रो पार्टीको महासमिति बैठकमा प्रस्तुत भएको धारणा र उल्लेख भएको विषय, कोसीका कुरा आदि इत्यादि उल्लेख गर्नुभयो । म एभरेज उपलब्धिमा सन्तुष्ट छैन, माथि उपलब्धि हासिल गर्न चाहन्थेँ भन्नुभएको छ, यसमा पनि आधार छैन । बहानाबाजी थियो,” उनले भने ।

डा. महतले निर्वाचनपश्चात् तीनपटक गठबन्धन बदल्ने काम प्रचण्डबाट भएको उल्लेख गरे । पार्टीको महासमिति बैठकबाट निर्णय नै गरेर गठबन्धन बलियो बनाउने भनिएको उनले बताए । तर, प्रचण्डले आरोप लगाएर गठबन्धन भत्काएको उनको भनाइ छ ।

“हाम्रो महासमिति बैठकको निर्णय गठबन्धनलाई सुदृढ गरेर अघि बढाउने निर्णय थियो, कसले के बोले भन्ने महत्त्वपूर्ण कुरा हैन । यो गठबन्धनलाई निरन्तता दिने र मजबुद गर्ने निर्णय भएको थियो । तर, उहाँले बहानाबाजी बनाएर जानुभयो,” उनले थपे ।