काठमाडौं । नेपालमा केही दिनयता तापक्रम बढ्दै गएको छ । हिउँदयाम सकिएर प्रिमनसुन सुरु भएसँगै तापक्रम बढ्न थालेको हो ।

अब देशभरको तापक्रम क्रमशः बढ्दै जाने मौसम पूर्वानुमान महाशाखाले जनाएको छ । “हिउँदयाम सकियो, प्रिमनसुन सुरु भइसक्यो । अब क्रमिक रूपमा तापक्रम बढ्दै जाने हुन्छ,” महाशाखाका मौसमविद् राजु प्रधानाङ्गले बाह्रखरीसित भने ।

• के हो प्रि–मनसुन, कसरी हुन्छ यो सिजनमा वर्षा ? 

कुनै नयाँ मौसमी प्रणाली भित्रिएर लगातार वर्षा भएको अवस्थामा तापक्रममा केही गिरावट आउन सक्ने भए पनि तत्काल त्यस्तो सम्भावना नरहेको उनले प्रस्ट पारे । “तत्काल नयाँ प्रणाली भित्रने सम्भावना छैन । वर्षा हुने देखिँदैन,” उनले भने, “त्यसैले तापक्रम घट्ने अवस्था देखिँदैन ।”

शनिबार (हिजो)को तुलनामा आइतबार दिपायलको अधिकतम तापक्रम सामान्य कम छ । सुदूरपश्चिम र कर्णाली प्रदेशमा मौसममा थोरै बदलीका कारण केही स्थानमा त्यस्तो भएको उनको भनाइ छ ।

“सुदूरपश्चिम र कर्णाली प्रदेशमा पश्चिमी न्यूनचापीय प्रणालीको प्रभावले त्यस्तो भएको हो,” उनले भने, “तर, त्यो प्रणाली वर्षा गराउने खालको छैन । कमजोर छ । गण्डकी प्रदेशसम्म आएर टुंगिन्छ ।”

नेपालमा मे महिनामा बढी गर्मी हुने गरेको उनले जानकारी दिए ।

महाशाखाले आइतबार बेलुका सार्वजनिक गरेको २० स्थानको विवरणमध्ये जनकपुरको अधिकतम तापक्रम सबैभन्दा बढी ३१.८ डिग्री सेल्सियस मापन गरिएको छ । शनिबार जनकपुरको अधिकतम तापक्रम ३१.४ डिग्री सेल्सियस थियो ।

यस दिन दिपायलको अधिकतम तापक्रम २८.६ डिग्री सेल्सियस मापन गरिएको छ । शनिबार दिपायलको तापक्रम २९ डिग्री सेल्सियस थियो ।

आइतबार काठमाडौंको अधिकतम तापक्रम २६.५ डिग्री सेल्सियस मापन गरिएको छ । शनिबार काठमाडौंको अधिकतम तापक्रम २५.५ डिग्री सेल्सियस थियो ।

२० स्थानमध्ये जनकपुरपछि आइतबार धरानको अधिकतम तापक्रम ३०.३ डिग्री सेल्सियस मापन गरिएको छ । विराटनगरको अधिकतम तापक्रम २९.३, भैरहवाको २९.२ डिग्री सेल्सियस मापन गरिएको महाशाखाले जानकारी गराएको छ ।

महाशाखाले हरेक दिन बिहान पौने ९ बजे न्यूनतम र बेलुका पौने ६ बजे अधिकतम तापक्रम मापन गरी वेबसाइटमार्फत विवरण सार्वजनिक गर्ने गर्छ ।

आइतबारको तापक्रमको विवरण–

शनिबारको तापक्रमको विवरण–